Yowann 8 - An Bibel Kernewek 20234 (Kernewek Kemmyn)

An Venyn Kemmerys ow Kul Avoutri

¹ Mes Yesu eth dhe'n menydh Oliv.

² Ha myttin a-varr ev a dheuth arta dhe'n tempel, hag oll an bobel a dheuth dhodho; hag ev a esedhas ha dyski dhedha.

³ Ha'n skribys ha'n Fariseow a dhros dhodho benyn kemmerys ow kul avoutri, ha'y gorra y'n kres.

⁴ Yn-medhons dhodho, ‘Mester, an venyn ma a veu kemmerys ow kul avoutri, y'n gweythres y honan.

⁵ Y'n lagha, Moyses a erghis dhyn labydha benynes a'n par na; mes pandr'a leverydh jy?’

⁶ I a gewsis hemma dh'y brevi, rag may fe dhedha neb kuhudhans er y bynn. Mes Yesu a blegyas war-nans, ha skrifa y'n dor gans y vys.

⁷ Mes pan besyons ow kovynn orto, ev a sevis yn-bann ha leverel dhedha, ‘Neb ahanowgh a vo heb pegh, bedhes ev an kynsa dhe dewlel men orti.’

⁸ Hag arta ow plegya dhe'n dor, ev a skrifas y'n dor.

⁹ Mes an re a'n klewas omdennas onan hag onan, ow talleth gans an henavogyon, ha nyns o gesys saw ev, ha'n venyn a-ragdho.

¹⁰ Pan sevis, Yesu a leveris dhedhi, ‘Benyn, ple'mons i? A ny'th kuhudhas denvyth?’

¹¹ Hi a leveris, ‘Denvyth, Arloedh.’ Ha Yesu a leveris, ‘Na ny wrav vy dha guhudha. Ke, hag alemma rag na wra pegha namoy.’

Yesu, Golow an Bys

¹² Ytho Yesu a gewsis dhedha arta, ow leverel, ‘My yw golow an bys; neb a'm hol, ny gerdh yn tewlder, mes ev a'n jevydh an golow a vewnans.’

¹³ Rakhenna yn-medh an Fariseow dhodho, ‘Doen dustuni a wredh ahanas dha honan; nyns yw dha dhustuni gwir.’

¹⁴ Yesu a worthybis ha leverel dhedha, ‘Kyn tustuniav ahanav ow honan, ow dustuni yw gwir, rag my a woer a-ble teuth vy, ha ple'th av. Mes ny wodhowgh hwi a-ble esov ow tos na ple'th av.

¹⁵ Hwi a vreus war-lergh an kig; ny vreusav vy denvyth

¹⁶ Ha mar preusav vy, ow breus yw gwir; rag ny'n gwrav ow honan, mes my ha'n Tas neb a'm dannvonas a'n gwra.

¹⁷ Hag yn agas lagha skrifys yw, dustuni dew dhen dhe vos gwir.

¹⁸ My yw, neb a dheg dustuni ahanav ow honan, ha'n Tas neb a'm dannvonas a dheg dustuni ahanav.’

¹⁹ Ytho yn-medhons dhodho, ‘Ple'ma dha Das?’ Yesu a worthybis, ‘Ny aswonnowgh na my na'm Tas; mar kwrellewgh ow aswonn vy, hwi a wrussa aswonn ow Thas ynwedh.’

²⁰ Ev a gewsis an geryow ma y'n arghow, hag ev ow tyski y'n tempel; ha ny wrug denvyth y dhalghenna, rag ny veu hwath devedhys y eur.

Ple'th Av, ny Yllowgh Dos

²¹ Yesu a leveris dhedha arta, ‘My a dhe-ves, ha hwi a vydh orth ow hwilas, ha hwi a verow yn agas pegh. Ple'th av, ny yllowgh dos.’

²² Ena yn-medh an Yedhewon, ‘A wra ev omladha y honan? rag ev a leveris, “Ple'th av, ny yllowgh dos.” ’

²³ Hag yn-medh ev dhedha, ‘Hwi yw dhiworth a-woeles, my yw a-wartha. Hwi yw a'n bys ma, nyns ov vy a'n bys ma.

²⁴ Ytho my a leveris dhywgh, hwi dhe verwel yn agas peghosow. Rag mar ny grysowgh my dhe vos ev, hwi a verow yn agas peghosow.’

²⁵ Ena i a leveris dhodho, ‘Piw osta?’ Yn-medh Yesu dhedha, ‘An pyth re leveris dhywgh a'n dalleth.

²⁶ Yma dhymm lies tra dhe leverel ha dhe vreusi a-dro dhywgh; mes neb a'm dannvonas yw gwir; ha'n pyth a glewis dhiworto, henna my a lever dhe'n bys.’

²⁷ Ny gonvedhsons ev dhe gewsel orta a'n Tas.

²⁸ Ena Yesu a leveris dhedha, ‘Pan dhrehevowgh Mab an den, ena hwi a aswonn my dhe vos ev, ha na wrav vy travyth ahanav ow honan; saw kepar dell dhyskas dhymm ow Thas, henna a gowsav.

²⁹ Yma genev vy ev neb a'm dannvonas. Ny'm gasas ow honan, rag pup-prys my a wra an pyth yw plegadow dhodho.’

³⁰ Hag ev ow kewsel hemma, lies a grysis ynno.

An Gwir a Wra agas Rydhhe

³¹ Ena Yesu a leveris dhe'n Yedhewon a grysis ynno, ‘Mar pesyowgh y'm ger, yth owgh hwi yn hwir ow dyskyblon,

³² ha hwi a woer an gwir, ha'n gwir a wra agas rydhhe.’

³³ I a worthybis dhodho, ‘Has Abraham on ni, ha nyns en ni bythkweth kethyon dhe dhenvyth. Fatell leverydh, “Hwi a vydh rydhhes”?’

³⁴ Yesu a worthybis dhedha, ‘Yn hwir, yn hwir y lavarav dhywgh, pubonan a wra pegh yw keth dhe begh.

³⁵ Ny drig an kethwas y'n chi bynitha; an mab a drig bynitha.

³⁶ Ytho mar kwra an Mab agas rydhhe, rydh yn tevri a vydhowgh.

³⁷ My a woer hwi dhe vos has Abraham; mes hwi a hwila ow ladha, rag ow ger ny'n jeves tyller ynnowgh.

³⁸ My a gews an pyth re welis vy a-rag ow Thas vy; ha hwi a wra an pyth re welsowgh gans agas tas hwi.’

Agas Tas an Jowl

³⁹ I a worthybis ha leverel dhodho, ‘Abraham yw agan tas.’ Yn-medh Yesu dhedha, ‘Mar pewgh fleghes Abraham, hwi a wrussa oberow Abraham.

⁴⁰ Mes lemmyn hwi a hwila ow ladha, den neb a dherivas dhywgh an gwir, hag a glewis vy a Dhuw. Ny wrug Abraham henna.

⁴¹ Hwi a wra oberow agas tas.’ Ena i a leveris dhodho, ‘Nyns on ni dineythys dre fornikasyon. Yma dhyn unn Tas, Duw.’

⁴² Yn-medh Yesu dhedha, ‘Mar pe Duw agas Tas, hwi a wrussa ow hara; rag my a dheuth dhiworth Duw, hag omma yth esov. Nyns ov vy devedhys ahanav ow honan, mes ev a'm dannvonas.

⁴³ Prag na gonvedhowgh ow lavar? Rag na wodhowgh hwi klewes ow ger.

⁴⁴ Hwi yw dhiworth agas tas an jowl, ha hwi a vynn gul hwansow agas tas. Ev a veu denledhyas a'n dalleth ha ny sevis y'n gwir, rag nyns eus gwiryonedh ynno. Pan lever gow, ev a lever a'y gnas y honan, rag gowleveryas yw ev, ha tas gowyow.

⁴⁵ Mes rag my dhe leverel an gwir, ny wrewgh ow krysi.

⁴⁶ Piw ahanowgh a'm kuhudh a begh? Ha mar lavarav an gwir, prag na wrewgh ow krysi?

⁴⁷ Ev neb yw a Dhuw a glew geryow Duw; rakhenna, hwi ny glewowgh, drefenn nag owgh hwi a Dhuw.’

Kyns Abraham dhe Vos, My Yw

⁴⁸ Ytho an Yedhewon a worthybis, ha leverel dhodho, ‘A ny leveryn yn ta, ty dhe vos Samaritan, ha dyowl dhe vos dhis?’

⁴⁹ Yesu a worthybis, ‘Nyns eus dhymm dyowl, mes my a enor ow Thas, ha hwi a'm disenor.

⁵⁰ Ha ny hwilav ow glori ow honan; yma neb a'n hwila, ha neb a vreus.

⁵¹ Yn hwir, yn hwir y lavarav dhywgh, piwpynag a wittho ow ger, ny welvydh mernans bynitha.’

⁵² Ena yn-medh an Yedhewon dhodho, ‘Lemmyn ni a woer bos dyowl genes. Abraham a verwis, ha'n brofoesi, ha ty a lever, “Piwpynag a wittho ow ger, ny wra ev tastya mernans bynitha.”

⁵³ Osta brassa es agan tas Abraham, neb a verwis? Ha'n brofoesi a verwis. Piw yth omwredh ty dhe vos?’

⁵⁴ Yesu a worthybis, ‘Mar kwrav vy ri glori dhymmo vy ow honan, ny dal ow glori travyth; mes ow Thas yw neb a wra ow glorifia, neb a leverowgh anodho, “Ev yw agan Duw.”

⁵⁵ Hwi ny'n aswonnowgh, mes my a'n aswonn; ha mar lavarren, “Ny'n aswonnav”, my a via gowleveryas, avelowgh hwi. Mes my a'n aswonn, ha my a with y er.

⁵⁶ Abraham agas tas a lowenhas dhe weles ow dydh; ev a'n gwelas, ha lowen veu.’

⁵⁷ Ena yn-medh an Yedhewon dhodho, ‘Nyns osta hwath hanter-kans bloedh, ha ty a welas Abraham?’

⁵⁸ Yn-medh Yesu dhedha, ‘Yn hwir, yn hwir y lavarav dhywgh, kyns Abraham dhe vos, yth esov vy.’

⁵⁹ Ena i a gemmeras meyn dhe dewlel orto; mes Yesu a omgudhas ha gasa an tempel.