Yowann 5 - An Bibel Kernewek 20234 (Kernewek Kemmyn)

An Yaghheans yn Poll Bethesda

¹ Wosa hemma yth esa goel dhe'n Yedhewon, ha Yesu eth yn-bann dhe Yerusalem.

² Yma yn Yerusalem poll ryb Porth an Deves, henwys yn Ebrow Bethzatha, ha dhodho pymp portal.

³ Ynna yth esa ow krowedha myns meur a glevyon, dall, evredhek ha palsyes, ow kortos gwayans an dowr.

⁴ Rag el an Arloedh e yn-nans y'n poll herwydh an seson ha trobla an dowr; ha'n kynsa den ow mos ynno wosa gwayans an dowr a veu yaghhes a by kleves pynag esa dhodho.

⁵ Hag yth esa ena unn den ha dhodho kleves etek blydhen warn ugens.

⁶ Yesu pan y'n gwelas ow krowedha, hag ow kodhvos ev dhe vos hirneth yndella, a leveris dhodho, ‘A vynnydh bos yaghhes?’

⁷ An den klav a worthybis dhodho, ‘Arloedh, nyns eus genev denvyth a'm gorro y'n poll pan vo troblys an dowr; mes, ha my ow tos, den arall a yn-nans a-dheragov.’

⁸ Yn-medh Yesu dhodho, ‘Sav, kemmer dha weli yn-bann, ha kerdh.’

⁹ Ha desempis an den a veu yagh, hag a gemmeras y weli yn-bann ha kerdhes. Ha'n jydh na o sabot.

¹⁰ Ytho an Yedhewon a leveris dhe'n den a veu yaghhes, ‘An sabot yw, ha nyns yw lafyl dhis ty dhe dhoen dha weli.’

¹¹ Ev a worthybis dhedha, ‘Ev neb a'm yaghhas, an keth henna a leveris dhymm, “Kemmer dha weli yn-bann, ha kerdh.” ’

¹² I a wovynnas orto, ‘Piw yw an den a leveris dhis, “Gwra y gemmeres yn-bann, ha kerdh”?’

¹³ Mes ny wodhva an den a veu yaghhes piw o, rag Yesu re omdennsa, drefenn bos routh y'n tyller na.

¹⁴ Wosa hemma, Yesu a'n kavas y'n tempel, hag a leveris dhodho, ‘Otta, ty yw yaghhes; na wra begha namoy, ma na hwarvo dhis neppyth gweth.’

¹⁵ An den eth dhe-ves, ha derivas dhe'n Yedhewon, Yesu dhe vos neb a wrussa y yaghhe.

¹⁶ Ha rakhenna an Yedhewon a helghyas Yesu, rag ev dhe wul hemma y'n sabot.

¹⁷ Mes Yesu a worthybis dhedha, ‘Ow Thas a ober bys lemmyn, ha my ynwedh a ober.’

¹⁸ Rakhenna ytho an Yedhewon a hwila dhe voy y ladha, ny veu henna yn unnsel rag ev dhe derri an sabot, mes ynwedh rag ev dhe elwel Duw y Das, orth y omwul par dhe Dhuw.

Awtorita an Mab

¹⁹ Ena Yesu a worthybis ha leverel dhedha, ‘Yn hwir, yn hwir y lavarav dhywgh, ny yll an Mab gul travyth y honan, marnas an pyth a wel ev an Tas dhe wul; rag pypynag a wra ev, an Mab ynwedh a'n gwra.

²⁰ Rag an Tas a gar an Mab hag a dhiskwa dhodho pup-tra a wra ev y honan; hag ev a dhiskwa dhodho oberow moy es an re ma, rag may kemmerrowgh marth.

²¹ Rag kepar dell wra an Tas drehevel an re varow ha ri dhedha bewnans, yndella ynwedh an Mab a re bewnans dhe biwpynag a vynno.

²² Rag ny vreus an Tas denvyth, mes ev re ros breus oll dhe'n Mab,

²³ may hwrello peub enora an Mab, kepar dell enorons an Tas. Neb na enor an Mab ny enor an Tas neb a'n dannvonas.

²⁴ Yn hwir, yn hwir y lavarav dhywgh, ev neb a glew ow ger hag a grys yn neb a'm dannvonas, yma dhodho bewnans heb diwedh, ha ny dheu dhe'n vreus, mes re dremenas a vernans dhe vewnans.

²⁵ ‘Yn hwir, yn hwir y lavarav dhywgh, an eur a dheu, ha lemmyn yth yw, pan glew an re varow lev Mab Duw, ha neb a glew, bewa a wrons.

²⁶ Rag kepar dell eus dhe'n Tas bewnans ynno y honan, yndella ynwedh ev re wrontyas dhe'n Mab kavoes bewnans ynno y honan.

²⁷ Hag ev a ros dhodho galloes dhe vreusi, rag ev dhe vos Mab an den.

²⁸ Na gemmerewgh marth a hemma, rag an eur a dheu pan glewvydh y lev peub eus y'n bedhow,

²⁹ hag i a dheu yn-mes; an re a wrug da bys yn dasserghyans bewnans, an re a wrug drog bys yn dasserghyans dampnasyon.

³⁰ ‘Ny allav vy ow honan gul travyth; kepar dell glewav y hwrav vy breusi, ha'm breus yw ewn, rag ny hwilav ow bolonjedh ow honan, mes bolonjedh ev neb a'm dannvonas.

Dustunioryon a-barth Yesu

³¹ ‘Mar tustuniav ahanav ow honan, nyns yw ow dustuni gwir.

³² Yma nebonan arall neb a dheg dustuni ahanav, ha my a woer an dustuni a wra ev y dhoen ahanav dhe vos gwir.

³³ Hwi a dhannvonas dhe Yowann, hag ev a dhug dustuni a'n gwiryonedh.

³⁴ Mes ny dhegemmerav an dustuni dhiworth den, mes my a lever hemma rag may fowgh hwi selwys.

³⁵ Ev a veu lugarn ow leski hag ow splanna, ha hwi a vynnas bos pur lowen pols yn y wolow.

³⁶ Mes yma dhymm dustuni brassa es dell esa dhe Yowann; rag an oberow a ros dhymm an Tas dhe gowlwul, an oberow na a wrav, i a dheg dustuni ahanav, an Tas dhe'm dannvon.

³⁷ Ha'n Tas neb a'm dannvonas, ev y honan re dhustunias ahanav. Ny glewsowgh hwi y lev bythkweth, na gweles y furv.

³⁸ Ha nyns eus dhywgh y er trigys ynnowgh, rag ny grysowgh ynno ev neb a wrug y dhannvon.

³⁹ ‘Hwi a hwila an skryptors, rag ynna y tybowgh hwi dhe gavoes bewnans heb diwedh. Hag i aga honan yw an re a dheg dustuni ahanav;

⁴⁰ mes ny vynnowgh dos dhymmo vy rag may fo bewnans dhywgh.

⁴¹ Ny dhegemmerav enor dhiworth tus,

⁴² mes my a'gas aswonn, nag usi kerensa Duw ynnowgh agas honan.

⁴³ My re dheuth yn hanow ow Thas, ha ny wrewgh ow degemmeres: mes mar teu nebonan arall yn y hanow y honan, henna a dhegemmerowgh.

⁴⁴ Fatell yllowgh hwi krysi, neb a dhegemmer enor an eyl dhiworth y gila, mes ny hwilowgh an enor na dheu marnas a Dhuw?

⁴⁵ Na dybewgh my dh'agas kuhudha a-rag an Tas; Moyses yth yw neb a wra agas kuhudha, ev neb re drestsowgh ynno.

⁴⁶ Rag mar kwrellewgh krysi yn Moyses, hwi a gryssa ynnov vy; rag ev a skrifas ahanav.

⁴⁷ Mes mar ny grysowgh y skrifow ev, fatell grysowgh ow geryow vy?’