Yowann 19 - An Bibel Kernewek 20234 (Kernewek Kemmyn)

¹ Ena Pilat a gemmeras Yesu, ha'y skorjya.

² Ha'n soudoryon a blethas kurun a spern ha'y gorra war y benn, hag i a'n kwethas gans mantell a burpur,

³ hag yth esens ow tos dhodho ha leverel, ‘Hayl, myghtern an Yedhewon!’ hag ow ri dhodho hwattys.

⁴ Ha Pilat eth yn-mes arta ha leverel dhedha, ‘Otta, my a'n dro yn-mes dhywgh, rag may hwodhvowgh na welav ken vytholl er y bynn.’

⁵ Ytho Yesu a dheuth yn-mes, ow kwiska an gurun a spern ha'n vantell a burpur, hag yn-medh ev dhedha, ‘Awott an den!’

⁶ Ytho pan y'n gwelas an bennoferysi ha'n soedhogyon, i a armas, ‘Krowsy e, krowsy e!’ Yn-medh Pilat dhedha, ‘Kemmerewgh e agas honan ha'y growsya; rag ny welav ken er y bynn.’

⁷ An Yedhewon a worthybis dhodho, ‘Yma dhyn lagha, ha herwydh an lagha na y tal dhodho merwel, rag ev a omwrug Mab Duw.’

⁸ Ytho pan glewas Pilat an lavar ma, ev a borthas own dhe voy,

⁹ hag ev eth a-bervedh y'n lys arta, ha leverel dhe Yesu, ‘A-ble osta?’ Mes ny ros Yesu gorthyp dhodho.

¹⁰ Ytho yn-medh Pilat dhodho, ‘A ny gewsydh dhymm? A ny wodhes bos dhymm galloes dhe'th telivra, ha bos dhymm galloes dhe'th krowsya?’

¹¹ Yesu a worthybis, ‘Ny via dhis maystri warnav mar ny ve res dhis a wartha; rakhenna yma dhe neb a'm daskorras dhis an brassa pegh.’

¹² Alena rag, Pilat a hwila y livra; mes an Yedhewon a armas, ow leverel, ‘Mar livrydh an den ma, nyns osta koweth Sesar.’

¹³ Pilat ytho pan glewas an geryow ma a dhros Yesu yn-mes, hag esedha war an barr yn tyller henwys an Leur a Leghven, hag yn Ebrow Gabbatha.

¹⁴ Ha dydh darbar an pask o, a-dro dhe'n hweghves eur. Hag yn-medh ev dhe'n Yedhewon, ‘Awotta agas myghtern!’

¹⁵ Ytho i a armas, ‘Kemmer e dhe-ves, kemmer e; krowsy e!’ Yn-medh Pilat dhedha, ‘A wrav vy krowsya agas myghtern?’ An bennoferysi a worthybis, ‘Nyns eus dhyn myghtern marnas Sesar.’

¹⁶ Ena ev a'n delivras dhedha dhe vos krowsys. Ytho i a gemmeras Yesu,

Krowsyans Yesu

¹⁷ hag ev eth yn-rag ow toen y grows y honan bys yn tyller henwys Tyller Krogen, hag yn Ebrow, Golgotha;

¹⁸ i a'n krowsyas ena ha ganso dew arall, onan a bub tu, ha Yesu y'n kres.

¹⁹ Ha Pilat a skrifas titel, ha'y worra war an grows; ha skrifys veu: Yesu a Nazareth, Myghtern an Yedhewon.

²⁰ Lies a'n Yedhewon a redyas an titel ma, rag bos an tyller may feu Yesu krowsys ogas dhe'n sita; ha skrifys veu yn Ebrow, Greka ha Latin.

²¹ Ytho yn-medh pennoferysi an Yedhewon dhe Pilat, ‘Na skrif “Myghtern an Yedhewon”, mes ev dhe leverel “My yw myghtern an Yedhewon”.’

²² Pilat a worthybis, ‘An pyth a skrifis, my re'n skrifas.’

²³ Ena an soudoryon, pan wrussens krowsya Yesu, a gemmeras y dhillas ha gul peder rann, dhe bub souder rann, hag ynwedh an bows. Mes an bows o heb gwri, gwiys a'n gwartha yn unn darn.

²⁴ Yn-medhons ytho an eyl dh'y gila, ‘Na wren hy skwardya, mes gwren ni tewlel prenn rygdhi, piw y fydh dhodho’; may fe kollenwys an skryptor a lever, ‘I a rannas ow dillas yntredha, ha war ow gwisk i a dewlis prenn.’ Ytho an soudoryon a wrug an taklow ma.

²⁵ Ogas dhe grows Yesu yth esa ow sevel y vamm ha hwoer y vamm, Maria gwreg Klopas, ha Maria Magdalena.

²⁶ Ytho pan welas Yesu y vamm ha'n dyskybel a gara ow sevel yn ogas, yn-medh ev dh'y vamm, ‘Benyn, awotta dha vab.’

²⁷ Ena yn-medh ev dhe'n dyskybel, ‘Awotta dha vamm.’ Hag alena rag an dyskybel a's kemmeras yn y dre y honan.

Mernans Yesu

²⁸ Wosa hemma, Yesu, ow kodhvos pup-tra lemmyn dhe vos kowlwrys, may fe kollenwys an skryptor, a leveris, ‘Yma syghes dhymm.’

²⁹ Yth esa lester re beu gorrys ena, leun a aysel; ytho i a worras spong leun a'n aysel war hyssop ha'y brofya dh'y anow.

³⁰ Ytho pan wrussa Yesu kemmeres an aysel, ev a leveris, ‘Kowlwrys yw.’ Hag ow poesa y benn war-rag, ev a dhaskorras an enev.

Tenewen Yesu Gwenys gans Guw

³¹ Ytho rag y vos dydh an darbar, rag na worta an korfow war an grows y'n sabot (rag bos dydh an sabot na dy'goel ughel), an Yedhewon a bysis Pilat may fe terrys aga diwarr ha may fens degys dhe-ves.

³² Ytho an soudoryon a dheuth ha terri diwarr an kynsa, hag a'n arall a veu krowsys ganso.

³³ Mes pan dheuthons dhe Yesu ha gweles y vos marow seulabrys, ny dorrsons y dhiwarr.

³⁴ Mes onan a'n soudoryon a wanas y denewen gans guw, ha desempis y teuth yn-mes goes ha dowr.

³⁵ Hag ev neb a'n gwelas re dhug dustuni, ha'y dhustuni yw gwir; ev a woer ev dhe gewsel gwiryonedh, rag may kryssowgh hwi.

³⁶ Ha'n taklow ma a hwarva may fe kollenwys an skryptor, ‘Ny vydh askorn anodho terrys.’

³⁷ Hag arta skryptor arall a lever, ‘I a vir warnodho neb a wansons.’

Ynkleudhyans Yesu

³⁸ Wosa hemma, Yosep a Arimathea, onan a dhyskyblon Yesu, mes yn priva rag own a'n Yedhewon, a bysis Pilat may kemmerra korf Yesu. Ha Pilat a ros kummyas. Ytho ev a dheuth ha kemmeres y gorf.

³⁹ Nikodemus ynwedh a dheuth, ev neb a dheuth dhodho wostalleth yn nos, ow tri kemmysk a vyrr hag aloes, a-dro dhe gans peuns.

⁴⁰ Ytho i a gemmeras korf Yesu ha'y vaylya yn lystennow lien war-lergh us an Yedhewon rag ynkleudhyans.

⁴¹ Lemmyn y'n tyller may feu Yesu krowsys yth esa lowarth, hag y'n lowarth yth esa bedh nowydh, na via denvyth bythkweth gorrys ynno.

⁴² Ytho, drefenn dydh Darbar an Yedhewon, ha rag bos an bedh ogas, i a worras Yesu ena.