Yowann 11 - An Bibel Kernewek 20234 (Kernewek Kemmyn)

Mernans Lazarus

¹ Yth esa den neb o klav, Lazarus a Bethani, tre Maria ha'y hwoer Martha.

² Maria o hi neb a uras an Arloedh gans unyent, ha sygha y dreys gans hy gols; ha'y broder Lazarus o klav.

³ Ytho an hwerydh a dhannvonas dhodho ow leverel, ‘Arloedh, otta, ev neb a gerydh yw klav.’

⁴ Pan glewas Yesu henna, yn-medh ev, ‘Nyns yw an kleves ma bys yn mernans, mes rag gordhyans Duw, may fo Mab Duw glorifiys dredho.’

⁵ Lemmyn Yesu a gara Martha ha'y hwoer, ha Lazarus.

⁶ Ytho pan glewas ev dhe vos klav, ev a wortas wosa henna dew dhydh y'n tyller mayth esa.

⁷ Ena a'y wosa yn-medh ev dh'y dhyskyblon, ‘Gwren ni mos arta dhe Yudi.’

⁸ Yn-medh an dhyskyblon dhodho, ‘Mester, an Yedhewon a hwilas dha labydha nammnygen; a vynnydh mos di arta?’

⁹ Yesu a worthybis, ‘A nyns eus dewdhek our y'n jydh? Piwpynag a gertho dydhweyth, ny drebuch ev, rag ev a wel golow an bys ma.

¹⁰ Mes piwpynag a gertho yn nos, ev a drebuch, rag nyns eus golow ynno.’

¹¹ Hemma a leveris, hag ena yn-medh ev dhedha, ‘Agan koweth Lazarus a gosk; mes yth av rag gul dhodho difuna.’

¹² Yn-medh an dhyskyblon dhodho, ‘Arloedh, mar kosk ev, ev a vydh saw.’

¹³ Mes Yesu re bia ow kewsel a'y vernans, mes i a dybis ev dhe gewsel a gosk rag powes.

¹⁴ Ena yn-medh Yesu dhedha yn kler, ‘Lazarus re verwis.

¹⁵ Ha lowen ov vy a-barth dhywgh, nag esen vy ena, rag may kryssowgh. Mes gwren ni mos dhodho.’

¹⁶ Ena yn-medh Tommas, henwys Didymus, dh'y gestyskyblon, ‘Gwren ni mos ynwedh, rag may ferwyn ganso.’

Yesu, an Dasserghyans ha'n Bewnans

¹⁷ Ytho pan dheuth Yesu, ev a'n kavas, growedhys y'n bedh nans o peswar dydh.

¹⁸ Bethani o ogas dhe Yerusalem, neb pymthek erowhys dhiworti.

¹⁹ Ha lies a'n Yedhewon a dheuth dhe Martha ha dhe Varia dh'aga honfortya a-dro dh'aga broder.

²⁰ Ytho pan glewas Martha Yesu dhe dhos, hi eth dh'y vetya; mes Maria o esedhys y'n chi.

²¹ Ena Martha a leveris dhe Yesu, ‘Arloedh, mar pes omma, ny wrussa ow broder merwel.

²² Mes lemmyn ynwedh my a woer, pypynag a wovynni a Dhuw, Duw a'n re dhis.’

²³ Yn-medh Yesu dhedhi, ‘Dha vroder a dhassergh.’

²⁴ Yn-medh Martha dhodho, ‘My a woer, ev dhe sevel arta y'n dasserghyans, dydh fin.’

²⁵ Yn-medh Yesu dhedhi, ‘My yw an dasserghyans ha'n bewnans; neb a grys ynnov vy, hwath kyn farwo, ev a vew;

²⁶ ha pubonan neb a vew hag a grys ynnov vy, ny verow bynitha. A grysydh hemma?’

²⁷ Yn-medh hi dhodho, ‘Arloedh, my a grys ty dhe vos an Krist, Mab Duw, neb a dal dos y'n bys.’

Yesu a Oel

²⁸ Ha wosa leverel hemma, hi eth ha gelwel Maria hy hwoer yn priva, ow leverel, ‘An Mester yw devedhys, hag ev a'th elow.’

²⁹ Kettell glewas hi hemma, hi a sevis uskis ha mos dhodho.

³⁰ Ny veu Yesu devedhys y'n dre na hwath, mes yth esa y'n tyller may hwrug Martha y vetya.

³¹ Ena an Yedhewon esa gensi y'n chi hag orth hy honfortya, ow kweles Maria dhe sevel uskis ha mos yn-mes, a wrug hy siwya, ow tybi hi dhe vos dhe'n bedh dhe oela ena.

³² Ena pan dheuth Maria dhe'n tyller mayth esa Yesu, ha'y weles, hi a goedhas orth y dreys, ow leverel dhodho, ‘Arloedh, mar pes omma, ny wrussa ow broder merwel.’

³³ Yesu ytho, pan y's gwelas owth oela, ha'n Yedhewon a dheuth gensi ynwedh owth oela, ev a veu movyes y'n spyrys, ha troblys;

³⁴ hag yn-medh ev, ‘Ple hwrussowgh y worra?’ Yn-medhons dhodho, ‘Arloedh, deus dhe weles.’

³⁵ Yesu a oelas.

³⁶ Ytho an Yedhewon a leveris, ‘Awotta, assa wrug ev y gara!’

³⁷ Mes re anedha a leveris, ‘A ny allsa an den ma, neb a igoras dewlagas an den dall, gul neppyth ma na wrella an den ma merwel?’

Lazarus Dres dhe Vewnans

³⁸ Yesu ytho, movyes arta ynno y honan, a dheuth dhe'n bedh. Fow ova, hag yth esa men ow krowedha a-dreus dhodho.

³⁹ Yesu a leveris, ‘Kemmerewgh an men dhe-ves.’ Martha, hwoer an den marow, a leveris dhodho, ‘Arloedh, y fydh flerys lemmyn, rag an peswora dydh yw.’

⁴⁰ Yn-medh Yesu dhedhi, ‘A ny leveris dhis, mar krysses, ty a welsa golewder Duw?’

⁴¹ Ytho i a gemmeras an men dhe-ves. Ha Yesu a dhrehevis y dhewlagas ha leverel, ‘A Das, my a woer gras dhis ty dhe'm klewes.

⁴² Ha my a wodhva, ty dhe'm klewes pup-prys, mes drefenn an routh a sev a-dro my a'n leveris, rag may kryssens ty dhe'm dannvon.’

⁴³ Ha wosa kewsel yndella, ev a grias gans lev ughel, ‘Lazarus, deus mes!’

⁴⁴ Ha'n den marow a dheuth yn-mes, kelmys y dreys ha'y dhiwleuv gans lystennow, ha'y fas maylys gans lien. Yn-medh Yesu dhedha, ‘Gwrewgh y dhigelmi, ha gesewgh ev dhe vos dhe-ves.’

An Bras dhe Ladha Yesu

⁴⁵ Ytho lies a'n Yedhewon neb a wrussa dos dhe Varia ha gweles an pyth a wrug ev, a grysis ynno.

⁴⁶ Mes re anedha eth dhe'n Fariseow, ha derivas dhedha an pyth a wrussa Yesu.

⁴⁷ Ena an bennoferysi ha'n Fariseow a guntellas an konsel ha leverel, ‘Pandr'a wren ni? Rag an den ma a wra lies tokyn.

⁴⁸ Mara'n gesyn yndella, pub den oll a vydh ow krysi ynno, ha'n Romanyon a dheu ha kemmeres dhe-ves agan tyller ha'gan kenedhel.’

⁴⁹ Mes onan anedha, Kayfas, neb o arghoferyas an vlydhen na, a leveris dhedha, ‘Ny wodhowgh hwi travyth,

⁵⁰ na ny reknowgh bos 'vas dhywgh, unn den dhe verwel rag an bobel, ma nag ello oll an genedhel dhe goll.’

⁵¹ Ny leveris hemma anodho y honan, mes, rag ev dhe vos arghoferyas an vlydhen na, ev a brofoesas Yesu dhe verwel a-barth an genedhel,

⁵² ha ny via unnsel rag an genedhel, mes rag kuntell war-barth yn onan fleghes Duw neb a veu skattrys.

⁵³ Ytho a'n jydh na i a dewlis towl dh'y ladha.

⁵⁴ Rakhenna ny wre Yesu kerdhes namoy yn apert yn mysk an Yedhewon, mes ev eth alena dhe'n vro ogas dhe'n gwylvos, dhe sita henwys Efraym, hag ena ev a wortas gans y dhyskyblon.

⁵⁵ Ha pask an Yedhewon o ogas, ha lies eth yn-bann dhiworth an pow kyns an pask, dhe omlanhe.

⁵⁶ Yth esens ow hwilas Yesu, hag ow sevel y'n tempel i a leveri an eyl dh'y gila, ‘Pandr'a brederowgh – na dheu ev dhe'n goel?’

⁵⁷ Mes an bennoferysi ha'n Fariseow a rossa gorhemmynn, piwpynag a wodhve ple'th esa, may rolla derivas, rag may talghennens ynno.