Yowann 10 - An Bibel Kernewek 20234 (Kernewek Kemmyn)

Parabolenn an Gorlann

¹ ‘Yn hwir, yn hwir y lavarav dhywgh, neb na dheu a-ji dhe gorlann an deves der an daras mes neb a yskynn war neb fordh arall, henn yw lader ha robbyer.

² Mes neb a dheu a-ji der an daras yw bugel an deves.

³ Dhodho an porther a iger, ha'n deves a glew y lev, hag ev a elow y dheves y honan orth hanow ha'ga ledya yn-mes.

⁴ Ha pan worr ev y dheves y honan yn-mes, ev a gerdh a-dheragdha, ha'n deves a'n siw, rag i dhe aswonn y lev.

⁵ Ny vynnons siwya estren, mes fia a wrons dhiworto, rag ny aswonnons lev estrenyon.’

⁶ Yesu a gewsis dhedha an barabolenn ma, mes ny gonvedhsons an pyth a leveri dhedha.

Yesu an Bugel Da

⁷ Ena Yesu a leveris arta, ‘Yn hwir, yn hwir y lavarav dhywgh, my yw daras an deves.

⁸ An re oll a dheuth kyns yw ladron ha robbyoryon, mes ny wrug an deves goslowes orta.

⁹ My yw an daras; piwpynag a dheffo a-ji dredhov vy, ev a vydh selwys, ha dos a-ji ha mos yn-mes a wra, ha kavoes peurva.

¹⁰ Ny dheu lader saw dhe ladra, ha ladha, ha distrui; my yw devedhys rag may fo dhedha bewnans, ha may fo dhedha palster anodho.

¹¹ ‘My yw an bugel da. An bugel da a dhaskorr y vewnans rag y dheves.

¹² Mes an goberwas, neb nag yw an bugel, ha ma nag yw an deves dhodho y honan, ev a wel an bleydh ow tos hag ev a as an deves ha fia, ha'n bleydh a wra aga hachya ha'ga skattra.

¹³ Henn yw rag ev dhe vos goberwas, ha ny vern dhodho travyth a-dro dhe'n deves.

¹⁴ My yw an bugel da, ha my a aswonn ow deves ow honan, ha'm re ow honan a'm aswonn vy.

¹⁵ Kepar dell wra an Tas ow aswonn, my ynwedh a aswonn an Tas, ha my a dhaskorr ow bewnans rag an deves.

¹⁶ Hag yma dhymm deves erell, nag yns a'n gorlann ma; res yw dhymm aga dri ynwedh, hag i a glew ow lev; hag y fydh unn flokk, unn bugel.

¹⁷ Rag hemma, an Tas a'm kar, rag my a dhaskorr ow bewnans, rag may hwrylliv y gemmeres arta.

¹⁸ Denvyth ny wra y gemmeres dhiworthiv, mes my a'n daskorr a'm bodh ow honan. Yma dhymm galloes dh'y dhaskorr, hag yma dhymm galloes dh'y gemmeres arta; my re dhegemmeras an arghadow ma dhiworth ow Thas.’

¹⁹ Ena yth esa fols arta yn mysk an Yedhewon drefenn an geryow ma.

²⁰ Lies a leveris, ‘Yma dyowl dhodho, ha varyes yw; prag y hwoslewowgh orto?’

²¹ Yn-medh re erell, ‘Nyns yw an re ma an geryow a dhen ha dhodho dyowl. A yll dyowl igeri dewlagas an dhellyon?’

Yesu Skonys gans an Yedhewon

²² Ena y feu goel an Sakrans yn Yerusalem; gwav o hi.

²³ Hag yth esa Yesu ow kerdhes y'n tempel, yn portal Solomon.

²⁴ Ena an Yedhewon a dheuth a-dro dhodho ha leverel dhodho, ‘Pes termyn y'gan synsydh yn fienasow? Mars osta an Krist, lavar dhyn yn apert.’

²⁵ Yesu a worthybis dhedha, ‘My a leveris dhywgh, ha ny wrussowgh hwi krysi. An oberow a wrav yn hanow ow Thas, i a dheg dustuni ahanav;

²⁶ mes ny grysowgh hwi, rag nyns owgh hwi a'm deves vy.

²⁷ Ow deves a glew ow lev, ha my a's aswonn, hag i a'm siw.

²⁸ Ha my a re dhedha bewnans heb diwedh, ha ny wrons i mos dhe goll bynitha, ha denvyth ny wra aga hemmeres yn-mes a'm dorn.

²⁹ Brassa ages pup-tra yw ow Thas, neb a's ros dhymm, ha ny yll denvyth aga hemmeres yn-mes a leuv an Tas.

³⁰ My ha'm Tas yw onan.’

³¹ Ytho an Yedhewon a gemmeras meyn yn-bann arta, rag may hwrellens y labydha.

³² Yesu a worthybis dhedha, ‘My re dhiskwedhas dhywgh lies ober da dhiworth an Tas; rag py ober anedha y fynnowgh ow labydha?’

³³ An Yedhewon a worthybis dhodho, ‘Ny wren dha labydha rag ober da, mes rag blasfemi, ha rag ty, ow pos den, dhe omwul Duw.’

³⁴ Yesu a worthybis dhedha, ‘A nyns yw skrifys yn agas lagha, My a leveris, Hwi yw duwow?

³⁵ Mar kwrug ev aga henwel duwow may teuth ger Duw dhedha (ha ny yll an skryptor bos terrys),

³⁶ a yllowgh leverel anodho ev neb a wrug an Tas y sakra ha'y dhannvon y'n bys, “Ty a lever blasfemi”, rag my dhe leverel, “Mab Duw ov vy”?

³⁷ Mar ny wrav oberow ow Thas, na grysewgh ynnov.

³⁸ Mes mar kwrav, kyn na wrewgh krysi dhymm, krysewgh an oberow, rag may hwryllowgh godhvos ha krysi an Tas dhe vos ynnov vy, ha my y'n Tas.’

³⁹ Ytho i a hwilas arta y dhalghenna, mes ev a skapyas a'ga dorn.

⁴⁰ Hag ev eth dhe-ves arta dhe'n tu arall dhe'n Yordan, dhe'n tyller mayth esa Yowann ow pesydhya y'n dalleth, hag a wortas ena.

⁴¹ Ha lies a dheuth dhodho, hag i a leveris, ‘Ny wrug Yowann tokyn vyth, mes pup-tra a leveris Yowann a-dro dhe'n den ma o gwir.’

⁴² Ha lies a grysis ynno y'n tyller na.