Yoshua 21 - An Bibel Kernewek 20234 (Kernewek Kemmyn)

Sitys an Levysi

¹ Ena pennow teyluyow an Levysi a dheuth dhe Eleazar an oferyas ha dhe Yoshua mab Nun ha dhe bennow teyluyow loethow mebyon Ysrael;

² hag i a leveris dhedha yn Shilo yn pow Kanan, ‘An Arloedh a worhemmynnis dre leuv Moyses ri dhyn sitys rag triga ynna, war-barth gans peurvaow rag agan bestes.’

³ Ytho mebyon Ysrael a ros dhe'n Levysi yn-mes a'ga eretons aga honan war-lergh ganow an Arloedh, an sitys ma ha'ga feurvaow.

⁴ An kynsa koelbrenn a dheuth yn-mes rag teyluyow an Kohathysi. Ytho an Levysi mebyon Aron an oferyas a dhegemmeras trydhek sita dewisys gans koelbrenn dhiworth loeth Yuda, ha dhiworth loeth an Simeonysi, ha dhiworth loeth Benyamin.

⁵ Remenant an Kohathysi a dhegemmeras deg sita gans koelbrenn dhiworth teyluyow loethow Efraym, Dan, ha hanter-loeth Manasse.

⁶ An Gershonysi a dhegemmeras trydhek sita gans koelbrenn dhiworth teyluyow loethow Yssakar, Asher, Naftali, ha hanter-loeth Manasse yn Bashan.

⁷ An Merarysi a dhegemmeras dewdhek sita war-lergh aga theyluyow dhiworth loeth Rewben, dhiworth loeth Gad, ha dhiworth loeth Zebulun.

⁸ Ytho an Ysraelysi a ros dhe'n Levysi gans koelbrenn an sitys ma ha'ga feurvaow, dell worhemmynnis an Arloedh dre leuv Moyses.

⁹ Hag i a ros yn-mes a loethow mebyon Yuda ha Simeon, an sitys henwys omma:

¹⁰ i a veu res dhe deyluyow an Kohathysi a vebyon Levi, vebyon Aron, rag an kynsa koelbrenn a goedhas dhedha.

¹¹ I a ros dhedha Kiryath-arba (Arba o tas Anak), honn yw Hebron, yn bro venydhyek Yuda, gans an peurva yn hy hyrghynn.

¹² Mes i a rosa parkow an sita ha'y godrevow dhe Kaleb mab Yefunne rag y berghennogeth.

¹³ Dhe vebyon Aron an oferyas i a ros Hebron, sita meneghi rag an ladher, gans hy feurva, ha Libna gans hy feurva,

¹⁴ Yattir gans hy feurva, Eshtemoa gans hy feurva,

¹⁵ Holon gans hy feurva, Debir gans hy feurva,

¹⁶ Ayn gans hy feurva, Yutta gans hy feurva, ha Beth-shemesh gans hy feurva: naw sita dhiworth an dhew loeth ma.

¹⁷ Ha dhiworth loeth Benyamin: Gibeon gans hy feurva, Geba gans hy feurva,

¹⁸ Anathoth gans hy feurva, hag Almon gans hy feurva: peder sita.

¹⁹ Sommenn sitys mebyon Aron, an oferysi: trydhek sita gans aga feurvaow.

²⁰ Remenant teyluyow Kohathysi an Levysi a dhegemmeras sitys gans koelbrenn dhiworth loeth Efraym.

²¹ I a ros dhedha Shekem gans hy feurva yn bro venydhyek Efraym, sita meneghi rag an ladher, ha Gezer gans hy feurva,

²² Kibsaym gans hy feurva, ha Beth-horon gans hy feurva: peder sita.

²³ Dhiworth loeth Dan: Elteke gans hy feurva, Gibbethon gans hy feurva,

²⁴ Ayyalon gans hy feurva, Gath-rimmon gans hy feurva: peder sita.

²⁵ Dhiworth hanter-loeth Manasse, Taanak gans hy feurva, ha Gath-rimmon gans hy feurva: diw sita.

²⁶ Yth esa sommenn a dheg sita gans aga feurvaow rag remenant teyluyow an Kohathysi.

²⁷ I a ros dhe'n Gershonysi a deyluyow an Levysi, dhiworth hanter-loeth Manasse, Golan yn Bashan gans hy feurva, sita meneghi rag an ladher, ha Beeshtera gans hy feurva: diw sita.

²⁸ Dhiworth loeth Yssakar: Kishyon gans hy feurva, Daberath gans hy feurva,

²⁹ Yarmuth gans hy feurva, En-gannim gans hy feurva: peder sita;

³⁰ Dhiworth loeth Asher: Mishal gans hy feurva, Abdon gans hy feurva,

³¹ Helkath gans hy feurva, ha Rehob gans hy feurva: peder sita.

³² Dhiworth loeth Naftali: Kedesh yn Galile gans hy feurva, sita meneghi rag an ladher, Hammoth-dor gans hy feurva, ha Kartan gans hy feurva; teyr sita.

³³ Sommenn sitys teyluyow an Gershonysi a veu trydhek, gans hy feurvaow.

³⁴ Dhe remenant an Levysi, teyluyow an Merarysi i a ros dhiworth loeth Zebulun: Yokneam gans hy feurva, Karta gans hy feurva,

³⁵ Dimna gans hy feurva, Nahalal gans hy feurva: peder sita.

³⁶ Dhiworth loeth Rewben: Beser gans hy feurva, Yahas gans hy feurva,

³⁷ Kedemoth gans hy feurva, ha Mefaath gans hy feurva: peder sita.

³⁸ Dhiworth loeth Gad: Ramoth yn Gilead gans hy feurva, sita meneghi rag an ladher, Mahanaym gans hy feurva,

³⁹ Heshbon gans hy feurva, Yazer gans hy feurva: sommenn a beder sita.

⁴⁰ Ytho sommenn an sitys res gans koelbrenn dhe deyluyow an Merarysi, remenant an Levysi, o dewdhek sita.

⁴¹ Sommenn sitys an Levysi synsys gans an Ysraelysi o eth sita ha dew-ugens gans aga feurvaow.

⁴² Pubonan a'n sitys ma a's tevo hy feurva yn hy hyrghynn; yndella y feu rag oll an sitys ma.

⁴³ Yndella Arloedh a ros dhe Ysrael oll an tir a dosa y ri dh'aga thasow; hag i a'n eritas, ha triga ynno.

⁴⁴ Ha'n Arloedh a ros dhedha powes oll a-derdro, war-lergh oll a dosa dh'aga thasow; ha nyns esa gour dhiworth oll aga eskerens a allas sevel er aga fynn; rag an Arloedh a ros oll aga eskerens yn aga leuv.

⁴⁵ Ny fyllis nagonan a'n ambosow da re gowssa an Arloedh dhe ji Ysrael; pubonan oll a veu kollenwys.