Yoshua 16 - An Bibel Kernewek 20234 (Kernewek Kemmyn)

Eretons Efraym ha Manasse

¹ Hemm o an tiredh rynnys gans koelbrenn dhe vebyon Yosep: dhiworth an Yordan ryb Yeriko a'n howldrevel dhe dhowrow Yeriko ryb an gwylvos, ow mos yn-bann dhiworth Yeriko dhe vro venydhyek Bethel.

² Yth eth yn-rag dhiworth Bethel (honn yw Luz) ha mos dhe Ataroth, or an Arkysi.

³ Ena yth eth yn-nans troha'n howlsedhes dhe or an Yafletysi, bys or Beth-horon isella, ha bys Gezer, ha'y diwedh o an mor.

⁴ Mebyon Yosep – Manasse hag Efraym – a gemmeras aga eretons.

⁵ Homm o or mebyon Efraym war-lergh aga theyluyow: or aga eretons dhe'n howldrevel o Ataroth-addar bys yn Beth-horon wartha,

⁶ ha'n or a besyas alena dhe'n mor dhe Mikmethath a'n gledhbarth; ha'n or a dreyl a'n howldrevel dhe Taanath-shilo, ha mos rybdho a'n howldrevel dhe Yanoagh.

⁷ Hi eth yn-nans dhiworth Yanoagh dhe Ataroth ha dhe Naara, ha tochya Yeriko, hag ystynn dhe'n Yordan.

⁸ Dhiworth Tappuagh yth eth troha'n howlsedhes dhe nans Kana, ha'y diwedh o an mor. Hemm o eretons loeth an Efraymysi war-lergh aga theyluyow.

⁹ Yth esa ynwedh sitys settys a-denewen rag an Efraymysi a-ji dhe eretons mebyon Manasse, oll an sitys gans aga godrevow.

¹⁰ Ny fessons an Kananysi trigys yn Gezer. Yma'n Kananysi trigys yn mysk an Efraymysi bys y'n jydh hedhyw, mes i re beu gorrys dhe hwel krev avel kethyon.