Yoshua 13 - An Bibel Kernewek 20234 (Kernewek Kemmyn)

Tir Hwath dhe vos Kemmerys

¹ Gyllys koth o Yoshua yn y dhydhyow; ha'n Arloedh a leveris dhodho, ‘Gyllys koth osta yn dha dhydhyow, hag yma gesys pur veur a dir rag bos eritys.

² Hemm yw an tir yw gesys hwath: oll oryon an Filistysi, hag oll oryon an Geshurysi

³ a-dhiworth an Shihor, usi a'n howldrevel dhe Ejyp, dhe or Ekron a'n gledhbarth (reknys yw avel kananek, kyn fo dhe bymp gwahalyeth an Filistysi, a Gaza, a Ashdod, a Ashkelon, a Gath, hag a Ekron); tiredh an Avviysi

⁴ war an barth dhyghow; oll tiredh an Kananysi dhiworth Meara yw dhe'n Sidonysi, bys Afek hag or an Amorysi;

⁵ tiredh an Gebalysi, hag oll Lebanon, troha'n howldrevel dhiworth Baal-gad yn-dann venydh Hermon bys Lebo-hamath.

⁶ My a fes a-rag an Ysraelysi oll trigoryon an vro venydhyek a-dhiworth Lebanon bys Misrefoth-maym, hag oll an Sidonysi. Lemen gwra henna dhe goedha rag an Ysraelysi avel aga eretons, dell worhemmynnis dhis.

⁷ Ytho lemmyn ro an tir ma avel aga eretons dhe'n naw loeth ha'n hanter-loeth Manasse.’

Rannans an Tir Dres an Yordan

⁸ An Rewbenysi ha'n Gadysi re gemmersa aga eretons a ros Moyses dhedha, a'n howldrevel dhe'n Yordan, dell ros Moyses gwas an Arloedh dhedha:

⁹ dhiworth Aroer, usi war vin nans Arnon, ha'n sita usi yn kres an nans, hag oll ughelgompesenn Medeba bys yn Dibon;

¹⁰ hag oll sitys Sihon myghtern an Amorysi a reynyas yn Heshbon, bys or an Ammonysi;

¹¹ ha Gilead, hag or an Geshurysi ha'n Maakathysi, hag oll menydh Hermon, hag oll Bashan bys Saleka;

¹² oll gwlas Og yn Bashan, a rewlyas yn Ashtaroth hag yn Edrei. Ev unnsel a veu gesys a remenant an Refaim, mes Moyses a's gweskis, ha'ga fesya.

¹³ Mes ny fesyas an Ysraelysi an Geshurysi na'n Maakathysi; mes yma Geshur ha Maakath trigys yn kres Ysrael bys y'n jydh ma.

¹⁴ Saw unnsel dhe loeth Levi ny ros ev rann; offrynnow leskys an Arloedh, Duw Ysrael yw aga eretons, dell leveris dhodho.

¹⁵ Moyses a ros tiredh dhe loeth an Rewbenysi war-lergh aga theyluyow.

¹⁶ Yth esa dhedha an or dhiworth Aroer, usi war vin nans Arnon, ha'n sita usi yn kres an nans, hag oll an ughelgompesenn ryb Medeba;

¹⁷ Heshbon hag oll hy threvow war an ughelgompesenn: Dibon, ha Bamoth-baal, Beth-baal-meon,

¹⁸ Yahas, Kedemoth, ha Mefaath,

¹⁹ Kiryathaym, Sibma, ha Sereth-shahar yn bre an nans,

²⁰ Beth-peor, ledrow Pisga, ha Beth-yeshimoth,

²¹ oll sitys an ughelgompesenn, oll gwlas Sihon myghtern an Amorysi, a rewlyas yn Heshbon, neb a wrug Moyses y weskel war-barth gans pennsevigyon Midyan, Evi, Rekem, Sur, Hur ha Reba, o omajers Sihon, esa trigys y'n tir.

²² An Ysraelysi a ladhas Balaam mab Beor, an koelyek gans an kledha yn mysk an re ledhys erell.

²³ Or mebyon Rewben a veu an Yordan ha'y diredh. An sitys ma ha'ga godrevow a veu eretons an Rewbenysi war-lergh aga theyluyow.

²⁴ Moyses a ros eretons dhe loeth Gad, dhe'n Gadysi war-lergh aga theyluyow.

²⁵ Aga or o Yazer, hag oll sitys Gilead, ha hanter tir an Ammonysi, bys yn Aroer, usi a'n howldrevel dhe Rabba,

²⁶ ha dhiworth Heshbon dhe Ramath-mispe ha Betonim, ha dhiworth Mahanaym dhe or Debir,

²⁷ hag y'n nans Beth-haram, Beth-nimra, Sukkoth, Safon, remenant gwlas Sihon myghtern Heshbon. An or o an Yordan ha'y diredh, bys yn amal mor Kinnereth, a'n howldrevel dhe'n Yordan.

²⁸ Hemm yw eretons mebyon Gad war-lergh aga theyluyow, an sitys ha'ga godrevow.

²⁹ Moyses a ros eretons dhe'n hanter-loeth Manasse; hemm o dhe hanter teylu mebyon Manasse war-lergh aga theyluyow.

³⁰ Yth esa aga or dhiworth Mahanaym, oll Bashan, oll gwlas Og myghtern Bashan, oll trevow Yair yn Bashan, tri-ugens sita,

³¹ hanter Gilead, hag Ashtaroth hag Edrei, sitys ryel Og yn Bashan. Hemm o rag mebyon Makir mab Manasse, rag hanter a vebyon Makir war-lergh aga theyluyow.

³² An re ma yw an tiryow a ros Moyses avel eretons yn plenys Moab, dres an Yordan a'n howldrevel dhe Yeriko.

³³ Mes ny ros Moyses eretons dhe loeth Levi; an Arloedh Duw yw aga eretons, dell leveris dhedha.