Yona 3 - An Bibel Kernewek 20234 (Kernewek Kemmyn)

Treylyans Nineve

¹ Ger an Arloedh a dheuth dhe Yona nessa treveth, ow leverel,

² ‘Sav, ke dhe Nineve, an sita vras, ha pregoth dhedhi an messaj a lavarav dhis.’

³ Ytho Yona a sevis, ha mos dhe Nineve, herwydh ger an Arloedh. Lemmyn sita vras dres musur veu Nineve, kerdh a dri dydh hy les.

⁴ Yona a dhallathas mos y'n sita, kerdh a unn jydh, hag ev a grias ha leverel, ‘Hwath dew-ugens dydh, ha Nineve a vydh domhwelys.’

⁵ Ytho gwer Nineve a grysis yn Duw, hag ordena penys, hag omgwetha gans yskar, bras ha byghan.

⁶ Pan dheuth an ger dhe vyghtern Nineve, ev a sevis a'y se ha diwiska y bows ryel, hag omgwetha gans yskar, hag esedha yn lusu.

⁷ Hag ev a dhellos gwarnyans yn Nineve: ‘Der arghadow an myghtern ha'y wahalyethow: Na wres den na best, gwarthek na deves, tastya travyth, na peuri, nag eva dowr;

⁸ mes bedhes den ha best kudhys gans yskar, ha kriens yn ter war Dhuw; ha treylya peub dhiworth y fordh dhrog, ha dhiworth an garowder usi yn aga diwla.

⁹ Piw a woer, a wra Duw treylya ha kemmeres edrek, ha treylya dhiworth y sorr fers, ma na wryllyn ni mos dhe goll?’

¹⁰ Ha Duw a welas aga oberow, i dhe dreylya dhiworth aga fordh dhrog; ha Duw a gemmeras edrek a'n drog a lavarsa ev dhe wul dhedha; ha ny'n gwrug.