Yeremia 7 - An Bibel Kernewek 20234 (Kernewek Kemmyn)

Pregoth Yeremia y'n Tempel

¹ An ger hag a dheuth dhe Yeremia a'n Arloedh, ow leverel:

² Sav yn porth chi an Arloedh, ha deklar ena an ger ma, ha leverel, Klewewgh ger an Arloedh, oll hwi a Yuda, a enter y'n porthow ma dhe wordhya an Arloedh.

³ Yndellma y lever Arloedh an luyow, Duw Ysrael: Gwellhewgh agas fordhow ha'gas gwriansow, ha my a wra dhywgh triga y'n tyller ma.

⁴ Na fydhyewgh yn geryow gow, ow leverel, ‘Hemm yw tempel an Arloedh, tempel an Arloedh, tempel an Arloedh.’

⁵ Rag mar kwellhowgh yn hwir agas fordhow ha'gas gwriansow; mar kwrewgh breusi yn hwir yntra gour ha'y gentrevek;

⁶ mar ny arweskowgh an alyon, an omdhivas, an wedhwes, ha mar ny skoellyowgh goes gwiryon y'n tyller ma, na kerdhes war-lergh duwow erell, dh'agas pystik agas honan,

⁷ ena my a as dhywgh triga y'n tyller ma, y'n tir a res dh'agas tasow, a-henys ha bys vykken.

⁸ Otta, hwi a fydh yn geryow gow, nag yns dhe les.

⁹ A wrewgh hwi ladra, moldra, gul avoutri, ti yn fals, ha leski offrynnow dhe Baal, ha kerdhes war-lergh duwow na aswonnsowgh;

¹⁰ hag ena dos ha sevel a-ragov y'n chi ma, may feu ow hanow gelwys warnodho, ha leverel, ‘Saw on’, mes ow pesya gul an traow kasadow ma?

¹¹ Yw an chi ma, may feu ow hanow gelwys warnodho, devedhys ha bos fow ladron yn agas golok? Otta, my ow honan re'n gwelas, yn-medh an Arloedh.

¹² Kewgh lemmyn bys y'm tyller esa yn Shilo, le may hwrugavy ow hanow dhe driga yn kynsa, ha gwelewgh an pyth a wrug dhodho drefenn drogedh ow fobel Ysrael.

¹³ Ha lemmyn, drefenn hwi dhe wul oll an taklow ma, yn-medh an Arloedh, ha my a gewsis dhywgh, ow sevel a-varr hag ow kewsel, mes ny glewsowgh; ha my a elwis dhywgh, mes ny worthybsowgh;

¹⁴ ytho my a wra dhe'n chi ma, may feu ow hanow gelwys warnodho, ynno may fydhyowgh, ha dhe'n tyller a res dhywgh ha dh'agas tasow, par dell wrug vy dhe Shilo.

¹⁵ Ha my a wra agas tewlel yn-mes a'm golok, dell dewlis yn-mes oll agas breder, has kowal Efraym.

¹⁶ Ty ytho, na bys rag an bobel ma, na na dhrehav kri na pysadow ragdha, na pledya genev: rag ny'th klewav.

¹⁷ A ny welydh an pyth a wrons yn sitys Yuda hag yn stretow Yerusalem?

¹⁸ An fleghes a guntell prenn, ha'n tasow a enow an tan, ha'n benynes a does an toes, dhe wul tesennow dhe vyghternes nev; hag i a dhinwa offrynnow diwes dhe dhuwow erell, ma'm provoksons dhe sorr.

¹⁹ Yw my neb a brovoksons dhe sorr? yn-medh an Arloedh: a nyns yw i aga honan, dh'aga meth aga honan?

²⁰ Ytho yndellma y lever an Arloedh Duw: Otta, ow sorr ha'm konnar a vydh dinewys war an tyller ma, war dhen ha vest, ha war wydh an mes, ha war frut an dor; ha leski a wra, ha ny vydh difeudhys.

²¹ Yndellma y lever Arloedh an luyow, Duw Ysrael: Keworrewgh agas offrynnow leskys dh'agas sakrifisow, ha dybri kig.

²² Rag ny gewsis dh'agas tasow, na ny worhemmynnis dhedha y'n jydh ma's dres yn-mes a bow Ejyp, a-dro dhe offrynnow leskys na sakrifisow.

²³ Mes an dra ma a worhemmynnis dhedha, ow leverel, ‘Bedhewgh gostydh dhe'm lev, ha my a vydh agas Duw, ha hwi a vydh ow fobel; ha kerdhewgh yn oll an fordhow may hworhemmynnis dhywgh, may fo yn ta genowgh.’

²⁴ Mes ny woslowsons, na ny blegsons aga skovarn, mes i a gerdhas war-lergh kusulyow ha gorthter aga holonn dhrog, ha mos war-dhelergh yn le war-rag.

²⁵ A-dhia'n jydh may teuth agas tasow yn-mes a bow Ejyp bys y'n jydh hedhyw, my re dhannvonas dhywgh oll ow servysi an brofoesi, orth aga dannvon dydh wosa dydh;

²⁶ mes ny woslowsons orthiv, na ny blegsons aga skovarn, mes i a galeshas aga hilbenn. I a wrug gweth ages aga thasow.

²⁷ Ytho ty a gews oll an geryow ma dhedha; mes ny wrons goslowes orthis: ty a elow dhedha; mes ny worthybons dhis.

²⁸ Ty a lever dhedha, Homm yw an genedhel na veu gostydh dhe lev an Arloedh aga Duw, na ny dhegemmeras dyskybleth; gwirder res eth dhe goll, ha treghys yw a-dhiworth aga ganow.

²⁹ Trogh dha wols, ha'y dewlel dhe-ves, drehav kynvann war an ugheldiryow moel, rag an Arloedh re naghas ha forsakya henedh y gonnar.

³⁰ Rag mebyon Yuda re wrug drogedh y'm golok, yn-medh an Arloedh; i re settyas aga thaklow kasadow y'n chi may feu ow hanow gelwys warnodho, dh'y dhefola.

³¹ Hag i re dhrehevis an tylleryow ughel a Tofeth, usi yn nans mab Hinnom, dhe leski aga mebyon ha'ga myrghes y'n tan; tra na worhemmynnis, na ny dheuth y'm kolonn.

³² Rakhenna otta, an dydhyow a dheu, yn-medh an Arloedh, ma na vydh gelwys namoy Tofeth, na nans mab Hinnom, mes nans an Ladhva: rag i a ynkleudh yn Tofeth bys pan na vo spas gesys.

³³ Korfow an bobel ma a vydh karyn dhe ydhyn an nev, ha rag bestes an nor; ha ny wra nagonan dh'aga chasya dhe-ves.

³⁴ Ena my a wra dhe hedhi a-dhiworth sitys Yuda, ha dhiworth stretow Yerusalem, lev lowender, ha lev heudhder, lev an gour pries, ha lev an venyn bries: rag an tir a vydh ynyal.