Yeremia 6 - An Bibel Kernewek 20234 (Kernewek Kemmyn)

Yerusalem yn-dann Wodros

¹ Fiewgh rag sawder, A hwi fleghes Benyamin, yn-mes a Yerusalem, ha hwytha an hirgorn yn Tekoa, ha drehevewgh arwoedh-dan yn Beth-hakkerem: rag drogedh a omdhiskwedh yn-mes a'n gogledh, ha distruyans meur.

² My re hevelebis myrgh Sion dhe beurva fethus.

³ Bugeledh gans aga flokkys a dheu dhedhi; i a dhrehav aga thyldow a-dro dhedhi; i a beur pubonan yn y dyller.

⁴ ‘Pareusewgh bresel er hy fynn; sevewgh, ha deun yn-bann y'n hanter-dydh.’ ‘Go-ni! rag an jydh a dremen, rag skeusow an gorthugher yw ystynnys.’

⁵ ‘Sevewgh, ha deun yn-bann y'n nos, ha distruyn hy falesyow.’

⁶ Rag yndella re gewsis Arloedh an luyow: Terrewgh hy gwydh, ha krugyewgh gweyth-esedhva erbynn Yerusalem: Ogh, sita a falsuri! nyns eus marnas arwask ynni.

⁷ Dell wra puth gwitha y dowrow govynn, yndellma hi a gwith yr hy thebelwrians: freudh ha diswrians yw klewys ynni; yma galar ha goliow prest a-ragov.

⁸ Bedhes dyskys, A Yerusalem, ma na dreyllyo ow enev divlasys ahanas; ma na'th wrav ynyal, tir anannedhys.

⁹ Yndellma y lever Arloedh an luyow: I a wra leun dhestryppya remenant Ysrael avel gwinbrenn: avel kuntellor gwinreun treyl dha leuv arta war on skorrennow.

¹⁰ Piw y kowsav dhodho, ha ri gwarnyans, may klewvons? Otta, aga skovarn yw antrodreghys, ha ny's teves goslowes; otta, ger an Arloedh yw keredh dhedha; ny's teves lowender ynno.

¹¹ Ytho leun ov vy a gonnar an Arloedh; skwith ov vy owth omfronna. Gwra hy dinewi war an fleghes y'n stret, ha war guntelles an wer yowynk maga ta: rag hwath an gour gans an wreg a vydh maglennys, an henavek ha'n den leun a dhydhyow.

¹² Aga chiow a dremen dhe re erell, parkow ha gwragedh maga ta: rag my a ystynn ow leuv war drigoryon an tir, yn-medh an Arloedh.

¹³ Rag a'n lyha anedha bys y'n meurra pubonan yw hwansek dhe wayn anewn; hag a'n profoes bys y'n oferyas pubonan a wra falsuri.

¹⁴ I re sawyas goli myrgh ow fobel gans skavder, ow leverel, ‘Kres, kres’, pan nag eus kres.

¹⁵ Esa meth dhedha pan wrussons pyth kasadow? Na, ny's teva meth vytholl, na ny's teva rudha: rakhenna i a wra koedha yn mysk an re a goedh: y'n termyn ma's kessydhyav i a vydh domhwelys, yn-medh an Arloedh.

¹⁶ Yndellma y lever an Arloedh, Sevewgh war an fordhow, ha mirewgh ha hwilewgh an hynsyow koth, le mayth yw da an fordh; ha kerdhes ynni ha hwi a gyv powes dh'agas enevow. Mes yn-medhons, ‘Ny vynnyn kerdhes ynni.’

¹⁷ Ha my a worras goelyadoryon warnowgh, ow leverel, ‘Goslowewgh orth son an hirgorn.’ Mes yn-medhons, ‘Ny vynnyn goslowes.’

¹⁸ Rakhenna klewewgh, hwi genedhlow, ha godhvydhewgh, A guntelles, pandr'a hwyrvydh dhedha.

¹⁹ Klew, A norvys: otta, my a dhre drogedh war an bobel ma, frut aga frederow, drefenn na woslowsons orth ow geryow, nag orth ow lagha, mes hy nagha.

²⁰ Pandr'a amont dhymm frankynkys a-dhiworth Sheba, ha'n kalamus drudh a bow pell? Nyns yw agas offrynnow leskys kemmeradow, na nyns yw agas sakrifisow hweg plegadow dhymm.

²¹ Ytho yndellma y lever an Arloedh: Otta, my a worr a-rag an bobel ma sklanderyow may hwra koedha warnedha tasow ha mebyon war-barth; an kentrevek ha'y goweth a dhe goll.

²² Yndellma y lever an Arloedh: Otta, yma pobel ow tos a'n pow kledh, ha kenedhel veur a vydh difunys a bella rannow an nor.

²³ I a dhalghenn an warak ha'n guw; fell yns, ny's teves truedh; aga lev a romm kepar ha'n mor; i a varghogeth war vergh, arayys rag kas avel gwer bresel er dha bynn, A vyrgh Sion.

²⁴ ‘Ni re glewas son anodho: diweres yw agan diwleuv: angoes re'gan dalghennas, ha poen avel benyn yn gwelivesi.

²⁵ Na ge yn-mes dhe'n gwel; na kerdhes war an fordh; rag yma kledha dhe'n eskar, hag euth a bub tu.’

²⁶ A vyrgh ow fobel, omwrogys yn yskar, hag omrol yn lusu: gwra kyni, avel rag dha unn vab, kynvann a'n hwerwa: rag a-dhistowgh an distruer a dheu warnan.

²⁷ My re'th wrug assayer a alkan yn mysk ow fobel, ha purheor rag may hwodhvi hag assaya aga fordhow.

²⁸ I oll yw rebellys worth, ow kerdhes gans sklanderyow: brest ha horn yns i; meschyv a wrons i oll.

²⁹ An meginow a hwyth, an plomm yw kowlleskys gans an tan; an teudher a deudh yn euver; rag nyns yw an debeles terrys dhe-ves.

³⁰ Gelwys yns ‘arghans deneghys’, drefenn an Arloedh dh'aga denagha.