Yeremia 51 - An Bibel Kernewek 20234 (Kernewek Kemmyn)

¹ Yndellma y lever an Arloedh: Otta, my a wra dhe dhifuna erbynn Babylon hag erbynn annedhysi Kaldea an spyrys a dhistruer;

² ha my a dhannvon gwynselloryon dhe Babylon, hag i a's gwynsell. I a wakha hy thir pan dhons er hy fynn a bub tu yn dydh an ahwer.

³ Na esewgh an sether dhe blegya y warak, na gwiska y gaspows. Na sparyewgh hy gwer yowynk; kowldhistruyewgh oll hy lu.

⁴ I a goedh dhe'n leur ledhys yn pow an Kaldeanys, ha gwenys yn hy stretow.

⁵ Rag ny veu Ysrael na Yuda gwrys gwedhow gans aga Duw, Arloedh an luyow, kynth yw aga thir leun a gabel erbynn an Sans a Ysrael.

⁶ Fiewgh yn-mes a Babylon, re sawyo peub y vewnans! Na ewgh dhe goll drefenn hy anewnder, rag hemm yw termyn dial an Arloedh; ev a attal dhedhi hy gober.

⁷ Babylon o hanaf owr yn leuv an Arloedh, ow kul medhow oll an nor; an kenedhlow a evas a'y gwin; rakhenna an kenedhlow eth yn fuskok.

⁸ Distowgh Babylon yw koedhys ha brewys; kynewgh rygdhi! Kemmerewgh balsam rag hy goli; may fo martesen yaghhes.

⁹ Ni a assayas yaghhe Babylon, mes ny allas hi bos yaghhes. Gesewgh hi, ha gwren ni mos peub dh'y vro y honan; rag hy barn re dhrehedhas bys yn nev ha re beu drehevys hwath dhe'n ebron.

¹⁰ An Arloedh re dhros yn-mes agan gwiryow: dewgh, derivyn yn Sion ober an Arloedh agan Duw.

¹¹ Lymmewgh an sethow! Lenwewgh an goenyow! An Arloedh re dhrehevis spyrys myghternedh an Medys, rag y dowl a-dro dhe Babylon yw hy distrui, rag henn yw dial an Arloedh, dial rag y dempel.

¹² Sevewgh baner erbynn fosow Babylon; krevhewgh an goel; settyewgh goelyadoryon; pareusewgh an kontrewaytyansow; rag an Arloedh re dewlis ha re wrug an pyth a gewsis a-dro dhe annedhysi Babylon.

¹³ Ty neb usi trigys ryb dowrow meur, gans palster a dresoryow, dha dhiwedh yw devedhys, musur dha vewnans yw treghys.

¹⁴ Arloedh an luyow re dos re y honan: Yn sur my a'th lenow gans luyow avel hes lokustes, hag i a sev garm budhogoleth warnas.

¹⁵ Ev yw neb a wrug an nor der y nerth, neb a fondyas an nor gans y furneth, ha der y gonvedhes ev a ystynnas an nevow.

¹⁶ Pan dhrehav y lev yma tervans dowrow y'n nevow, hag ev a wra niwl dhe sevel a-dhiworth pennow an nor. Ev a wra lughes gans an glaw, hag ev a dhre gwyns yn-mes a'y dresoryow.

¹⁷ Pubonan yw talsogh ha heb godhvos; pub owrer a's teves meth drefenn y idolyow; rag y imajys teudh yw fals, ha nyns eus anall ynna.

¹⁸ Euver yns, ober rag ges; yn termyn aga hessydhyans i a dhe goll.

¹⁹ Nyns yw rann Yakob avella, rag ev yw Gwrier pup-tra, hag Ysrael yw loeth y eretons; Arloedh an luyow yw y hanow.

Ysrael yw Fust an Gwrier

²⁰ Ty yw kaspoel dhymm, ow arv vatel: genes my a vrew kenedhlow; my a dhistru gwlaskordhow;

²¹ genes my a vrew an margh ha'y varghek; genes my a vrew an charett ha'n charetter;

²² genes my a vrew gour ha benyn; genes my a vrew hen ha yowynk; ha genes my a vrew an gour yowynk ha'n voren;

²³ genes my a vrew an bugel ha'y flokk; genes my a vrew an tiek ha'y yew a oghen; genes my a vrew governours ha soedhogyon.

Breus Babylon

²⁴ My a attal dhe Babylon ha dhe oll annedhysi Kaldea rag oll an drog re wrussons yn Sion yn agas golok, yn-medh an Arloedh.

²⁵ Otta, yth esov er dha bynn, A venydh a dhistruyans, yn-medh an Arloedh, a dhistru oll an nor; my a ystynn ow leuv er dha bynn ha dha dhraylya dhe'n leur a'n klegeryow, ha gul dhis bos menydh leskys.

²⁶ Ny gemmerons ahanas men rag kornell na men rag selven mes ty a vydh ynyalder bys vykken, yn-medh an Arloedh.

²⁷ Drehevewgh baner y'n tir, hwythewgh hirgorn yn mysk an kenedhlow; pareusewgh an kenedhlow rag bresel er hy fynn, gelwewgh er hy fynn an gwlaskordhow, Ararat, Minni hag Ashkenaz; ordenewgh kaslewydh er hy fynn, drewgh yn-rag mergh avel hes lokustes.

²⁸ Pareusewgh an kenedhlow er hy fynn, myghternedh an Medys gans aga governours ha'ga soedhogyon ha pub gwlas yn-dann aga gwarthevyans.

²⁹ Ha'n tir a gren hag a wynn, rag porposys an Arloedh erbynn Babylon a sev, dhe wul tir Babylon ynyal, heb annedhyas.

³⁰ Breselyoryon Babylon re hepkorras omladh, i a worta yn aga dinasow; aga nerth re fyllis, i res eth ha bos avel benynes; tan re beu gorrys yn hy annedhow, hy barrow yw terrys.

³¹ Unn poenyer a boen dhe vetya ken onan, hag unn gannas dhe vetya ken onan, dhe leverel dhe vyghtern Babylon bos y sita kemmerys a benn dhe benn:

³² an rysyow re beu sesys, ha'n gorthfosow leskys gans tan, ha'n soudoryon a's teves own.

³³ Rag yndellma y lever Arloedh an luyow, Duw Ysrael: Myrgh Babylon yw avel leur-drushya y'n termyn mayth yw trettys; hwath unn pols byghan ha termyn hy threvas a dheu.

³⁴ ‘Nebukadnessar myghtern Babylon re'm kollonkas, ev re'm desyghas, ev a wrug dhymm bos lester gwag, ev re'm lonkas avel dragon; ev re lenwis y dorr gans ow taklow denteth, ev re'm trewas y'n mes.

³⁵ Re bo diellys war Babylon an drog gwrys er ow fynn hag erbynn ow hig’, yn-medh annedhysi Sion. ‘Re bo diellys ow goes war annedhysi Kaldea’, yn-medh Yerusalem.

³⁶ Ytho yndellma y lever an Arloedh: Otta, my a bled dha gen ha diella ragos. My a dhesygh hy mor ha gul dh'y fenten bos sygh;

³⁷ ha Babylon a vydh karnedhow, trigva owrgeun, tra euth ha hwibana, heb annedhyas.

³⁸ Avel lewyon yowynk i a us war-barth; i a romm avel kelyn lewyon.

³⁹ Yn aga gwres, my a bareus aga gwledh ha gul dhedha omvedhwi bys pan vydhons lowenek hag ena koska yn kosk bys vykken heb difuna nevra, yn-medh an Arloedh.

⁴⁰ My a's dre dhe'n leur avel eyn dhe'n ladhva, avel hordhes ha boghes.

⁴¹ Ass yw kemmerys Sheshak, ha sesys balghder oll an nor! Ass yw devedhys Babylon ha bos tra euth yn mysk an kenedhlow!

⁴² An mor re sevis war Babylon; hi re beu kudhys gans tervans y donnow.

⁴³ Hy sitys yw devedhys ha bos euth, tir syghor ha difeythtir, tir le ma nag eus trigys denvyth, ha dredho ma na dremen mab-den.

⁴⁴ My a gessydh Bel yn Babylon, ha kemmeres a'y anow an pyth re lonkas. Ny wra an kenedhlow frosa dhodho na fella; ynwedh fos Babylon re goedhas.

⁴⁵ Dewgh yn-mes anedhi, ow fobel! Sawyewgh agas bewnans, peub ahanowgh, a-dhiworth sorr fers an Arloedh!

⁴⁶ Na vedhewgh gwann agas kolonn na ownek drefenn an nowodhow klewys y'n tir – unn vlydhen unn hwedhel a dheu, an nessa blydhen ken onan, Yma freudh y'n tir, ha rewlyas erbynn rewlyas.

⁴⁷ Rakhenna an dydhyow a dheu pan gessydhav imajys Babylon; oll hy thir a vydh gorrys dhe veth hag oll hy re ledhys a goedh yn hy kres.

⁴⁸ Ena an nevow ha'n nor ha peub eus ynna, a arm rag lowender war Babylon; rag an dhistruoryon a dheu er aga fynn yn-mes a'n gogledh, yn-medh an Arloedh.

⁴⁹ Babylon a dal koedha drefenn an re ledhys a Ysrael, dell goedhas re ledhys oll an nor drefenn Babylon.

⁵⁰ Hwi re dhienkas dhiworth an kledha, kewgh, na daryewgh! Perthewgh kov a'n Arloedh a-bell, ha gesewgh Yerusalem dhe dhos yn agas brys.

⁵¹ Ni yw gorrys dhe veth drefenn ni dhe glewes keredh; disenor re gudhas agan fas, rag estrenyon re dheuth yn tylleryow sans chi an Arloedh.

⁵² Rakhenna otta, an dydhyow a dheu, yn-medh an Arloedh, pan gessydhav aga imajys gravys, hag yn oll hy thir an re woliys a gyn.

⁵³ Kyn yskynno Babylon dhe nev, ha kyn kerro hy ughelder krev, a-dhiworthiv distruoryon a dheu warnedhi, yn-medh an Arloedh.

⁵⁴ Yma son kri a-dhiworth Babylon, ha son distruyans meur a-dhiworth tir an Kaldeanys!

⁵⁵ Rag yma an Arloedh ow kwastya Babylon, hag ow koselhe hy lev meur. Aga thonnow a darenn avel dowrow pals, son aga thros a dhassen;

⁵⁶ rag distruer re dheuth er hy fynn, erbynn Babylon; hy breselyoryon yw kemmerys, aga gwaregow yw terrys; rag an Arloedh yw Duw a attal, ev a attal yn leun.

⁵⁷ My a wra medhwi hy fennsevigyon ha'y doethyon, ynwedh hy governours, hy soedhogyon ha'y breselyoryon; i a gosk yn kosk bys vykken heb difuna nevra, yn-medh an Myghtern, ha'y hanow Arloedh an luyow.

⁵⁸ Yndellma y lever Arloedh an luyow: Fos ledan Babylon a vydh terrys dhe'n leur, ha'y yetow ughel a vydh leskys gans tan. An bobel a lavur rag travyth, ha'n kenedhlow a omskwith rag tan.

Gorhemmynn Yeremia dhe Seraya

⁵⁹ An ger a worhemmynnis Yeremia an profoes dhe Seraya mab Neria mab Mahseya, pan eth dhe Babylon gans Sedekia myghtern Yuda, yn peswora blydhen y reyn. Seraya o an erberjour.

⁶⁰ Yeremia a skrifas yn unn rol-skrifa oll an anfeusi a dho war Babylon, oll an geryow ma yw skrifys a-dro dhe Babylon.

⁶¹ Ha Yeremia a leveris dhe Seraya: ‘Pan dheudh dhe Babylon, gwayt lenna oll an geryow ma,

⁶² ha leverel, “A Arloedh, ty dha honan a gewsis erbynn an tyller ma dh'y dhistrui, ma na vydh trigys ynno travyth, naneyl den na best, hag y fydh ynyal bys vykken.”

⁶³ Pan worfennydh lenna an rol-skrifa, kelm men orti, ha'y thewlel yn kres an Ewfrates,

⁶⁴ ha leverel, “Yndellma Babylon a sedh; ny vydh ow sevel namoy drefenn an anfeusi a dhrov warnedhi.” ’ Hemm yw diwedh geryow Yeremia.