Yeremia 42 - An Bibel Kernewek 20234 (Kernewek Kemmyn)

Kusul Yeremia dhe Yohanan

¹ Ena oll pennsevigyon an luyow, ha Yohanan mab Kareagh ha Yezania mab Hoshaia, hag oll an bobel a'n lyha dhe'n meurra a dheuth nes

² ha leverel dhe Yeremia an profoes, ‘Gas, ni a'th pys, agan pledyans dhe vos degemmerys a-ragos, ha pys dhe'n Arloedh a'gan govis, rag oll an remenant ma (rag ni yw gesys marnas boghes a'n lies, dell wel dha dhewlagas)

³ may hwrello an Arloedh dha Dhuw diskwedhes dhyn an fordh may kerdhyn ynni ha'n pyth a wren.’

⁴ Ena Yeremia an profoes a leveris dhedha, ‘My re'gas klewas: my a bys dhe'n Arloedh agas Duw war-lergh agas geryow, ha pypynag a worthyp an Arloedh my a lever dhywgh; ny withav travyth ahanowgh.’

⁵ Ena i a leveris dhe Yeremia, ‘Re bo an Arloedh gwir dhustunier ha len er agan pynn mar ny wren war-lergh pup-tra a dhannvon dhyn an Arloedh dha Dhuw dredhos.

⁶ Mars yw da po drog, ni a vydh gostydh dhe lev an Arloedh agan Duw dhe neb y'th tannvenyn may fo da genen pan vydhyn gostydh dhe lev an Arloedh agan Duw.’

⁷ Dhe benn deg dydh y teuth ger an Arloedh dhe Yeremia.

⁸ Ena ev a elwis Yohanan mab Kareagh hag oll pennsevigyon an luyow esa ganso, hag oll an bobel a'n lyha dhe'n meurra,

⁹ ha leverel dhedha, ‘Yndellma y lever an Arloedh, Duw Ysrael, dhe neb y'm dannvonsowgh dhe worra agas pledyans a-ragdho:

¹⁰ Mar trigowgh y'n tir ma, ena my a'gas drehav, a-der agas tenna dhe'n leur; my a'gas plans ha ny'gas diwreydhyav; rag edrek a'm beus a'n anfeusi a wrug dhywgh.

¹¹ Na berthewgh own a vyghtern Babylon, may perthowgh own anodho; na berthewgh own anodho, yn-medh an Arloedh, rag my a vydh genowgh, dh'agas sawya ha'gas livra a'y leuv.

¹² Ha my a dhiskwedh truedh dhywgh may kemmerro truedh ahanowgh ha'gas gasa dhe driga yn agas tir agas honan.

¹³ Mes mar leverowgh, “Ny vynnyn triga y'n tir ma”, ow pos diwostydh dhe lev an Arloedh agas Duw

¹⁴ ow leverel, “Na, mes ni a vynn mos yn pow Ejyp, le ma na welyn bresel, na klewes son an hirgorn, na bos nownek rag bara, hag ena y trigyn”,

¹⁵ ena klewewgh ger an Arloedh hwi remenant Yuda. Yndellma y lever Arloedh an luyow, Duw Ysrael: Mars owgh hwi ervirys dhe vos dhe Ejyp ha dhe driga ena,

¹⁶ ena an kledha may perthowgh own anodho a wra agas pursiwya bys yn pow Ejyp; ha'n divoetter esowgh ow perthi own anodho a wra agas pursiwya bys yn Ejyp; hag ena hwi a verow.

¹⁷ Oll an bobel ervirys dhe vos dhe Ejyp dhe driga ena a verow gans an kledha, gans an divoetter ha gans an pla; ny vydh nagonan anedha gesys, na ny dhiank a-dhiworth an drog a dhrov warnedha.

¹⁸ ‘Rag yndellma y lever Arloedh an luyow, Duw Ysrael: Par dell veu diverys ow sorr hag ow honnar war annedhysi Yerusalem, yndellma ow honnar a vydh diverys warnowgh pan ewgh dhe Ejyp. Hwi a vydh molleth, hag euth, ha milliga ha keredh. Ny welowgh an tyller ma namoy.

¹⁹ An Arloedh re leveris dhywgh, hwi remenant Yuda, Nag ewgh dhe Ejyp. Godhvydhewgh my dh'agas gwarnya hedhyw

²⁰ hwi dhe vos yn sowdhan yn agas kolonn. Rag hwi agas honan a'm dannvonas dhe'n Arloedh agas Duw, ow leverel, “Pys a'gan govis dhe'n Arloedh agan Duw, ha war-lergh an pyth a lever an Arloedh agan Duw, lavar dhyn, ha ni a'n gwra.”

²¹ Ha lemmyn my re gewsis dhywgh hedhyw, mes ny vewgh gostydh dhe lev an Arloedh agas Duw yn travyth ma'm dannvonas dh'y leverel dhywgh.

²² Godhvydhewgh ytho yn ta, hwi a verow gans an kledha, gans an divoetter ha gans an pla y'n tyller may fynnowgh mos ha triga.’