Yeremia 3 - An Bibel Kernewek 20234 (Kernewek Kemmyn)

Ysrael Dislel

¹ Mar korr gour y wreg a-denewen, ha hi a'n gas, ha dos ha bos dhe gen gour, a wra ev dehweles dhedhi? A ny via an tir na defolys meur? Mes ty re horyas gans lies karer; hwath y fynnydh dehweles dhymm? yn-medh an Arloedh.

² Drehav dha dhewlagas dhe'n ugheldiryow moel, ha mir: ple na wrowedhsons genes? Ty a esedhas ragdha y'n fordhow kepar ha'n Arab y'n gwylvos; ha ty re dhefolas an tir gans dha horyans ha'th trogedh.

³ Rakhenna an kowasow re beu skonys, ha ny dheuth an glaw diwedhes; ha ty a'th o tal hora, ty a naghas kemmeres meth.

⁴ A ny wruss'ta kria warnav nammnygen, ‘Ow Thas, ty yw koweth ow yowynkneth –

⁵ A vydh ev serrys bys vykken? A wra ev gwitha y sorrvann dhe'n diwedh?’ Yndella ty re gewsis; mes ty re wrug oll an drogedh a yllsys.

Galow dhe Edrega

⁶ An Arloedh a leveris dhymm ynwedh yn dydhyow Yosia an myghtern: A welsys an taklow dislel a wrug Ysrael? Hi yw yskynnys war bub menydh ughel hag yn-dann bub wydhenn las, hag ena hi re horyas.

⁷ Ha my a leveris, ‘Wosa hi dhe wul oll an traow ma, Martesen hi a dhehwel dhymm’; mes ny dhehwelis hi. Ha'y hwoer draytus Yuda a'n gwelas.

⁸ Ha hi a welas, rag oll avoutri Ysrael dhislel, my dh'y gorra dhe-ves gans skrifenn didhemmedhyans; hwath hy hwoer draytus Yuda ny's teva own, mes hi ynwedh eth dhe horya.

⁹ Hag y hwarva drefenn skavder hy horyans, hi dhe dhefola an tir, ha gul avoutri gans men ha gans prenn.

¹⁰ Mes yn spit dhe oll hemma, ny dreylyas hy hwoer draytus Yuda dhymm gans oll hy holonn, mes yn fayntys, yn-medh an Arloedh.

¹¹ Ha'n Arloedh a leveris dhymm, Ysrael dislel re omdhiskwedhas le kablus ages Yuda draytus.

¹² Ke ha deklar an geryow ma dhe'n gogledh, ha leverel, Dehwel ty Ysrael dhislel, yn-medh an Arloedh; ny wrav ow sorr dhe goedha warnas: rag tregeredhus ov, yn-medh an Arloedh, ha ny withav sorr bys vykken.

¹³ Mes unnweyth aswonn dha dhrogober, may treuspassys erbynn an Arloedh dha Dhuw, ha may resys dha honan yn hel dhe estrenyon yn-dann bub gwydhenn las, ha ny woslewsowgh orth ow lev, yn-medh an Arloedh.

¹⁴ Treylyewgh, hwi fleghes dislen, yn-medh an Arloedh, rag my re'gas demmedhis: my a'gas kemmer, onan a sita, ha dew a deylu, ha my a'gas dre dhe Sion:

¹⁵ Ha my a re dhywgh bugeledh herwydh ow holonn, hag i a'gas mag gans godhvos ha konvedhes.

¹⁶ Hag y hwyrvydh, pan vydhowgh palshes ha kressys y'n tir, y'n dydhyow na, yn-medh an Arloedh, ny leverons moy, ‘Argh kevambos an Arloedh.’ Ny dheu y'n brys; na ny vydh kovhes; na ny vynnons y visitya namoy; na ny vydh henna gwrys arta.

¹⁷ Y'n termyn na i a elow Yerusalem Tron an Arloedh; hag oll an kenedhlow a vydh kuntellys dhedhi, dhe hanow an Arloedh yn Yerusalem: ha ny holyons yn hworth namoy aga thebel golonn.

¹⁸ Y'n dydhyow na chi Yuda a wra kerdhes gans chi Ysrael, hag i a dheu war-barth yn-mes a dir an gogledh dhe'n tir a res rag eretons dh'agas tasow.

¹⁹ Mes my a leveris, Fatell wrav vy dha worra yn mysk ow mebyon, ha ri dhis tir plegadow, an tekka ertach a'n kenedhlow oll? Ha my a leveris, Ty a'm galow, Ow thas; ha ny dreylydh arta ahanav.

²⁰ Yn sur dell dhiberth gwreg yn traytus a-dhiworth hy gour, yndellma hwi re beu dislel dhymm, A ji Ysrael, yn-medh an Arloedh.

²¹ Lev a veu klewys war an ugheldiryow moel, oelva ha pysadow mebyon Ysrael, rag i re gammdreylyas aga fordh, hag i re ankovas an Arloedh aga Duw:

²² Dehwelewgh, hwi vebyon dhislen, ha my a yaghha agas dislelder. ‘Otta, ni a dheu dhis: rag ty yw an Arloedh agan Duw.

²³ Yn hwir euver yw toell an breow, ha tervans an menydhyow: yn hwir y'n Arloedh agan Duw yma selwyans Ysrael.

²⁴ ‘Rag meth re dhevoryas lavur agan tasow a-dhia agan yowynkneth; aga flokkys ha'ga greow, aga mebyon ha'ga myrghes.

²⁵ Ni a wrowedh yn agan meth, ha'gan despit a'gan kudh: rag ni re beghas erbynn an Arloedh agan Duw, ni ha'gan tasow, a-dhia agan yowynkneth ha hwath bys y'n jydh ma, ha ny obayson lev an Arloedh agan Duw.’