Yeremia 27 - An Bibel Kernewek 20234 (Kernewek Kemmyn)

Tokyn an Yew

¹ Yn dalleth reyn Yehoyakim mab Yosia myghtern Yuda y teuth an ger ma dhe Yeremia a-dhiworth an Arloedh.

² Yndellma y lever an Arloedh dhymm: Gwra dhis rawyow ha yewow, ha'ga gorra war dha gonna.

³ Ha dannvon dhe vyghtern Edom, ha dhe vyghtern Moab, ha dhe vyghtern an Ammonysi, ha dhe vyghtern Tyr, ha dhe vyghtern Sidon dre leuv an kannasow a dheu dhe Yerusalem dhe Sedekia myghtern Yuda.

⁴ Gorhemmynn dhedha may lavarrons dh'aga mestrysi: Yndellma y lever Arloedh an luyow, Duw Ysrael: Hemm yw an pyth a leverowgh dh'agas mestrysi:

⁵ My re wrug an nor, an den ha'n best usi war an nor, der ow galloes meur ha der ow bregh ystynnys, ha'y ri dhe biwpynag a blekkyo dhymm.

⁶ Ha lemmyn my re ros oll an tiryow ma yn leuv Nebukadnessar myghtern Babylon, ow gwas, ha my re ros ynwedh bestes an gwel dh'y servya.

⁷ An kenedhlow oll a'n serv, ha'y vab, ha mab y vab, bys pan dheu termyn y dir y honan; ena lies kenedhel ha myghternedh veur a wra y gethhe.

⁸ Mes mar ny vynn kenedhel po gwlaskor servya an keth Nebukadnessar ma, myghtern Babylon, ha gorra aga honna yn-dann yew myghtern Babylon, ena my a gessydh an genedhel na gans an kledha, gans divoetter, ha gans an pla, yn-medh an Arloedh, bys pan y's distruav der y leuv.

⁹ Ytho, na woslowewgh orth agas profoesi, na'gas koelyogyon, na'gas hunrosysi, na'gas hudoryon, na'gas pystrioryon, a gews dhywgh, ow leverel, ‘Ny servyowgh myghtern Babylon.’

¹⁰ Rag i a brofoes gow dhywgh, may fydhowgh gorrys pell dhiworth agas tir; my a'gas fes yn-mes, ha hwi a dhe goll.

¹¹ Mes an kenedhlow a dhre aga honna yn-dann yew myghtern Babylon ha'y servya, an re na my a's gas yn aga thir aga honan, yn-medh an Arloedh, dh'y wonedha ha triga ynno.

¹² My a gewsis ynwedh orth Sedekia myghtern Yuda war-lergh oll an geryow ma, ow leverel, Drewgh agas konna yn-dann yew myghtern Babylon, ha'y servya ev ha'y bobel, ha bewa.

¹³ Prag y ferwowgh, ty ha'th pobel gans an kledha, gans an divoetter, ha gans an pla, dell leveris an Arloedh a-dro dhe genedhel pynag na serv myghtern Babylon?

¹⁴ Ytho na woslowewgh orth geryow an brofoesi a gews dhywgh, ow leverel, Na servyewgh myghtern Yuda, rag i a brofoes gow dhywgh.

¹⁵ Rag ny's dannvenis, yn-medh an Arloedh, mes i a brofoes gow y'm hanow, ma'gas fesyav yn-mes hag yth ewgh dhe goll, hwi ha'n brofoesi a brofoes dhywgh.

¹⁶ Ena my a gewsis dhe'n oferysi hag oll an bobel ma, ow leverel, Yndellma y lever an Arloedh: Na woslowewgh orth geryow agas profoesi a brofoes dhywgh, ow leverel ‘Lestri chi an Arloedh a vydh daskorrys dhywgh a-dhiworth Babylon’, rag i a brofoes gow dhywgh.

¹⁷ Na woslowewgh orta; servyewgh myghtern Babylon ha bewa. Prag y tal bos an sita ma magoryow?

¹⁸ Mes mars yns profoesi, ha mars yw ger an Arloedh gansa, pysens war Arloedh an luyow, ma nag ello dhe Babylon an lestri gesys yn chi an Arloedh, hag yn chi myghtern Yuda, hag yn Yerusalem.

¹⁹ Rag yndellma y lever Arloedh an luyow a-dro dhe'n kolovenyow, an mor, an synsellow ha remenant an lestri yw gesys y'n sita ma,

²⁰ na wrug Nebukadnessar myghtern Babylon aga hemmeres pan dhug yn divroedh Yekonia mab Yekoyakim myghtern Yuda a-dhiworth Yerusalem dhe Babylon, hag oll ugheloryon Yuda ha Yerusalem,

²¹ rag yndellma y lever Arloedh an luyow, Duw Ysrael, a-dro dhe'n lestri yw gesys yn chi an Arloedh, yn chi myghtern Yuda, hag yn Yerusalem:

²² I a vydh degys dhe Babylon, hag ena i a worta, bys y'n jydh mayth av dh'aga visitya yn-medh an Arloedh. Ena my a's deg ha'ga daskorr dhe'n tyller ma.