Yeremia 24 - An Bibel Kernewek 20234 (Kernewek Kemmyn)

Figys Da ha Drog

¹ An Arloedh a dhiskwedhas dhymm, hag otta, dew ganstell a figys a veu gorrys a-rag tempel an Arloedh wosa Nebukadnessar myghtern Babylon dhe dhoen yn divroedh Yekonia mab Yehoyakim myghtern Yuda, ha pennsevigyon Yuda, gans an seri prenn ha'n wovyon, a-dhiworth Yerusalem, ha'ga dri dhe Babylon.

² Unn ganstell a'n jevo figys pur dha, avel figys yw kynsa adhves, mes an ganstell arall a'n jevo figys pur dhrog, mar dhrog ma ny yllens bos dybrys.

³ Ena an Arloedh a leveris dhymm, ‘Pandr'a welydh, Yeremia?’ Ha my a leveris, ‘Figys; an figys da, pur dha; ha'n re drog, pur dhrog, mar dhrog ma na yllens bos dybrys.’

⁴ Ena ger an Arloedh a dheuth dhymm, ow leverel:

⁵ Yndellma y lever an Arloedh, Duw Ysrael: Avel an figys da ma, yndella my a aswonn an dhivresow a Yuda, hag a dhannvenis yn-mes a'n tyller ma dhe bow an Kaldeanys rag aga les.

⁶ Rag my a sett ow golok warnedha rag da, ha my a's dre arta dhe'n tir ma. My a's drehav, ha ny's tennav dhe'n dor; my a'ga flans, ha ny's diwreydhyav.

⁷ Ha my a re kolonn dhedha dhe'm aswonn, ow bos an Arloedh; hag i a vydh ow fobel, ha my a vydh aga Duw, rag i a dhehwel dhymm gans oll aga holonn.

⁸ Hag avel an drog figys na yll bos dybrys rag aga bos mar dhrog, yn-medh an Arloedh, yndella y hwrav dhe Sedekia myghtern Yuda, ha'y bennsevigyon ha remenant Yerusalem yw gesys y'n tir ma, ha'n re usi trigys yn pow Ejyp.

⁹ My a wra dhedha bos euth, pyth drog, yn oll gwlaskordhow an nor, dhe vos keredh ha droglavar, tont ha molleth yn oll an tylleryow ma's fesyav.

¹⁰ Ha my a dhannvon an kledha, divoetter, ha'n pla yntredhon, bys pan vydhons distruys yn tien a'n tir a res dhedha ha dh'aga thasow.