Yeremia 23 - An Bibel Kernewek 20234 (Kernewek Kemmyn)

An ARLOEDH ha'y Dheves

¹ Go-i an vugeledh a dhistru ha skattra deves ow feurva! yn-medh an Arloedh.

² Rakhenna yndellma y lever an Arloedh, Duw Ysrael, erbynn an vugeledh a vugel ow fobel: Hwi re skattras ow deves ha'ga fesya, ha ny woelsowgh warnedha. Ytho my a visit warnowgh drogedh agas gwriansow, yn-medh an Arloedh.

³ Ha my a guntell remenant ow flokk yn-mes a'n tiryow ma's fesis ha'ga dri arta dh'aga horlann, hag i a dheg froeth ha kressya.

⁴ Ha my a worr bugeledh warnedha dh'aga bugelya; ha ny berthons own namoy na bos dyegrys, na fyllel, yn-medh an Arloedh.

An Skorrenn Wiryon

⁵ Otta, an dydhyow a dheu, yn-medh an Arloedh, pan dhrehavav dhe Davydh Skorrenn wiryon, ha myghtern a reyn ha sewena, hag a wra gwirvreus hag ewnder y'n tir.

⁶ Yn y dhydhyow Yuda a vydh selwys hag Ysrael a vew yn sawder. Ha hemm yw an hanow may fydh gelwys: An Arloedh agan Ewnder.

⁷ Ytho, yma an dydhyow ow tos, yn-medh an Arloedh, ma na vydh leverys namoy, ‘Dell vew an Arloedh neb a dhros mebyon Ysrael yn-mes a bow Ejyp’,

⁸ mes ‘Dell vew an Arloedh neb a dhros ha hembronk has chi Ysrael yn-mes a dir an gogledh hag yn-mes a oll an powyow ma's fesis.’ Ena triga a wrons yn aga thir aga honan.

Erbynn an Fals Profoesi

⁹ A-dro dhe'n brofoesi: Ow holonn ynnov yw terrys, ow eskern oll a gren; avel gour medhow ov, hag avel gour fethys gans gwin, drefenn an Arloedh, ha drefenn geryow y sansoleth.

¹⁰ Rag an tir yw leun a avoutroryon; drefenn an molleth an tir a dhesygh, ha peurvaow an difeythtir yw krinys. Aga hyns yw drog, ha'ga nerth nyns yw ewn.

¹¹ Rag ha profoes hag oferyas yw ansans; hwath yn ow chi my re gavas aga drogedh, yn-medh an Arloedh.

¹² Ytho aga fordh a vydh avel hynsyow slynk y'n tewlder, may fydhons herdhys ynna ha koedha: rag my a dhre drogedh warnedha yn blydhen aga hessydhyans, yn-medh an Arloedh.

¹³ Yn profoesi Samaria my re welas tra dhivlas: i a brofoesas re Baal, ha gul dhe'm pobel mos yn stray.

¹⁴ Hag yn profoesi Yerusalem: my re welas tra skruthus: avoutri a wrons, ha kerdhes yn gowyow; i a grevha diwla an dhrogoberoryon, ma na dreyl nagonan a-dhiworth y dhrogedh; yth yns i oll avel Sodom dhymm, ha'y annedhysi avel Gomorra.

¹⁵ Ytho yndellma y lever Arloedh an luyow a-dro dhe'n brofoesi: ‘Otta, my a's boes gans fuelenn ha gul dhedha eva dowr gwenonek; rag a-dhiworth profoesi Yerusalem ansansoleth res eth yn oll an tir.’

¹⁶ Yndellma y lever Arloedh an luyow: Na woslowewgh orth geryow an brofoesi a brofoes dhywgh; i a'gas gwra koeg: i a gews gwelesigeth aga holonn aga honan, a-der a-dhiworth ganow an Arloedh.

¹⁷ I a lever dhe'n re a dhispres ger an Arloedh, ‘Hwi a'gas bydh kres’, ha dhe bubonan a siw gorthter y golonn, ‘Ny dheu terroes warnowgh.’

¹⁸ Rag piw re sevis yn konsel an Arloedh, ha gweles ha klewes y er? Piw re woslowas orth y er ha'y glewes?

¹⁹ Otta, korwyns an Arloedh! konnar res eth yn-mes, hag annawel ow troyllya: troyllya a wra war benn an debeles.

²⁰ Ny dreyl sorr an Arloedh dhe-ves bys pan wra ev kompoesa ha kowlwul towlow y golonn. Y'n dydhyow diwettha hwi a'n konvedh yn kler.

²¹ Ny dhannvenis an brofoesi mes i a boenyas; ny gewsis dhedha mes i a brofoesas.

²² Mes mar saffens y'm kusul, ha gul dhe'n bobel klewes ow geryow, ena i a'n dreylsa dhiworth aga drog fordh, hag a dhrogedh aga gwriansow.

²³ Ov vy Duw usi yn ogas, yn-medh an Arloedh, a-der Duw usi pell?

²⁴ A yll gour omgudha yn tylleryow kudhys ma na'n gwelav? yn-medh an Arloedh. A ny wrav lenwel nev ha nor? yn-medh an Arloedh.

²⁵ My re glewas an pyth a lever an brofoesi usi ow profoesa gowyow y'm hanow, ow leverel, ‘My re hunrosas, my re hunrosas!’

²⁶ Pes termyn y fydh hemma yn kolonn an brofoesi a brofoes gowyow, hag a brofoes toell aga holonn aga honan?

²⁷ I a vynn gul dhe'm pobel ankevi ow hanow der aga hunrosow, a leverons an eyl dh'y gila, dell ankovas aga thasow ow hanow drefenn Baal.

²⁸ An profoes neb a'n jeves hunros, gas dhodho derivas an hunros, ha neb a'n jeves ow ger, gas ev dhe gewsel ow ger yn lel. Pyth yw an kulyn dhe'n gwaneth? yn-medh an Arloedh.

²⁹ A nyns yw ow ger avel tan? yn-medh an Arloedh, hag avel morthol a derr karrek dhe demmyn?

³⁰ Otta ytho, yth esov erbynn an brofoesi, yn-medh an Arloedh, a lader ow geryow an eyl a'y gila.

³¹ Otta, yth esov erbynn an brofoesi, yn-medh an Arloedh, rag i a wra devnydh a'ga thaves aga honan ha leverel, ‘Y lever an Arloedh.’

³² Otta, yth esov erbynn an re a brofoes fals hunrosow, yn-medh an Arloedh, hag a wra aga derivas, ha gul dhe'm pobel mos yn stray der aga gowyow ha'ga bostya; mes ny's dannvenis, na gorhemmynna dhedha; ytho ny vydhons dhe les rag an bobel ma, yn-medh an Arloedh.

³³ Ha pan wovynn orthis an bobel ma, po an profoes, po oferyas, ‘Pyth yw begh an Arloedh?’ ty a lever dhedha, ‘Hwi yw an begh, ha my a wra agas forsakya, yn-medh an Arloedh.’

³⁴ Ha'n profoes, po an oferyas, po an bobel neb a lever, ‘Begh an Arloedh’, my a gessydh an gour na ha'y ji.

³⁵ Yndella hwi a lever peub dh'y gentrevek, ha peub dh'y vroder, ‘Pandr'yw gorthyp an Arloedh?’ ha ‘Pandr'a leveris an Arloedh?’

³⁶ Mes ny venegowgh ‘Begh an Arloedh’ namoy; rag ger pub den a vydh y vegh y honan; rag hwi re gammdreylyas geryow an Duw bew, Arloedh an luyow, agan Duw.

³⁷ Yndellma ty a lever dhe'n profoes, ‘Pandr'a worthybis an Arloedh dhis?’ ha ‘Pandr'a leveris an Arloedh?’

³⁸ Mes mar leverowgh ‘Begh an Arloedh’, yndellma y lever an Arloedh: Drefenn hwi dhe leverel an ger ma, ‘Begh an Arloedh’, pan dhannvenis dhywgh, ow leverel, Ny leverowgh, ‘Begh an Arloedh’,

³⁹ rakhenna otta, my a'gas ankev yn tien, ha'gas tewlel dhe-ves dhiworth ow fas, hwi ha'n sita a res dhywgh ha dh'agas tasow.

⁴⁰ Ha my a dhre warnowgh despit bynitha ha meth bynitha, na vydh ankevys.