Yeremia 20 - An Bibel Kernewek 20234 (Kernewek Kemmyn)

Yeremia Gweskys gans Pashhur

¹ Lemmyn Pashhur mab Immer an oferyas, neb o ynwedh pennsoedhek yn chi an Arloedh, a glewas Yeremia ow profoesa an traow ma.

² Ena Pashhur a weskis Yeremia an profoes, ha'y worra yn stokkys esa yn Yet Benyamin wartha, esa yn chi an Arloedh.

³ Ha'n nessa myttin Pashhur a livras Yeremia a'n stokkys. Ena Yeremia a leveris dhodho, Ny'th henwis an Arloedh Pashhur, mes Magor-missabib.

⁴ Rag yndellma y lever an Arloedh: Otta, my a'th wra browagh dhis dha honan, ha dhe'th kowetha oll: hag i a goedh gans kledha aga eskerens, ha'th tewlagas a'n gwel: ha my a re Yuda oll yn leuv myghtern Babylon, hag ev a's deg yn divroedh yn Babylon, ha'ga ladha gans an kledha.

⁵ Kekeffrys my a re tresor oll an sita ma, hag oll frut hy lavur, hag oll hy thaklow drudh, ha provians oll myghternedh Yuda – my a's re yn leuv aga eskerens, hag i a's pyll, ha'ga doen dhe Babylon.

⁶ Ha ty, Pashhur, ha pubonan usi trigys y'th chi a wra mos yn kethneth: ha ty a dheu dhe Babylon, hag ena ty a verow, ha bos ynkleudhys ena, ty, ha'th kowetha oll, neb may profoessys gowyow dhedha.

Krodhvol Yeremia

⁷ A Arloedh, ty re'm dynyas, ha my a veu dynys: ty a'm gwaskas yn krev, ha ty re fethas: skornys ov pub dydh, pubonan a wra ges ahanav.

⁸ Rag peskweyth may kowsav, my a gri, my a arm ‘Freudh ha distruyans!’ Rag ger an Arloedh a dheuth ha bos keredh dhymm, ha skorn pub dydh.

⁹ Ena my a leveris, ‘Ny'n kampoellav, na kewsel namoy yn y hanow.’ Mes ynnov yma neppyth haval dhe dan ow leski deges y'm eskern, ha skwith ov owth omfronna, ha ny allav y berthi.

¹⁰ Rag my a glewas kabel lies huni: ‘Euth a bub tu! Kuhudh e, gwren y guhudha.’ Yth esa oll ow neskerens ow kwaytya my dhe drebuchya, ow leverel, ‘Martesen ev a vydh dynys, ha ni a wra y fetha, ha tyli agan dial warnodho.’

¹¹ Mes yma an Arloedh genev avel kasor fell; ytho ow helghysi a drebuch, ha ny wrons fetha; i a's tevydh meth meur, rag ny sewenons: ny vydh ankevys aga disenor bys vykken.

¹² Mes, A Arloedh an luyow, neb a brev an re wiryon, neb a wel an dhiwloneth ha'n golonn, gas vy dhe weles dha dhial warnedha: rag dhiso jy my re dhiskwedhas ow hen.

¹³ Kenewgh dhe'n Arloedh, gormelewgh an Arloedh! Rag ev re dhelivras enev an boghosek a-dhiworth leuv an dhrogoberoryon.

¹⁴ Milliges re bo an jydh may feuv genys; an jydh ma'm dineythis ow mamm na'n as dhe vos bennigys.

¹⁵ Milliges re bo an gour a dhros nowodhow dhe'm tas, ow leverel, ‘Flogh gorow yw genys dhis’, orth y heudhhe yn feur.

¹⁶ Gas an gour na dhe vos avel an sitys a dhomhwelas an Arloedh, yn tibita; gas ev dhe glewes kri myttinweyth, ha garm yn hanter-dydh,

¹⁷ rag ny'm ladhas y'n dorr, may fe ow mamm ow bedh, ha'y thorr veghyek bys vykken.

¹⁸ Prag y teuth vy yn-mes a'n dorr dhe weles lavur hag ahwer, ha spena ow dydhyow yn meth?