Yeremia 2 - An Bibel Kernewek 20234 (Kernewek Kemmyn)

Duw a Bled gans Ysrael dhe Goedha yn Edrek

¹ Ha ger an Arloedh a dheuth dhymm, ow leverel,

² Ke ha kria yn skovornow Yerusalem, ow leverel, Yndellma y lever an Arloedh: My a berth kov ahanas, lelder dha yowynkneth, dha gerensa avel benyn bries nowydh, pan ythys war ow lergh y'n gwylvos, yn tir na veu gonedhys.

³ Ysrael o sansoleth dhe'n Arloedh, ha kynsa frut y askorr: kablus o peub a'n devorya; drog a dheu warnedha, yn-medh an Arloedh.

⁴ Klewewgh ger an Arloedh, A ji Yakob, hag oll teyluyow chi Ysrael:

⁵ Yndellma y lever an Arloedh Pana dhrogober re gavas aga thasow ynnov, mayth ens gyllys pell ahanav, ha may kerdhsons war-lergh euveredh, ha devedhys ha bos euver vons?

⁶ Ha ny lavarsons, ‘Ple'ma an Arloedh a'gan dros yn-mes a bow Ejyp, a'gan hembronkas der an gwylvos, dre dir a dhifeythtiryow hag a byttow, dre dir a syghor, hag a skeus ankow dre dir ma na dremenas gour, ha le nag eus trigys den?’

⁷ Ha my a'gas dros yn tir feyth, dhe dhybri an frut anodho ha'n dader anodho; mes pan entersowgh, hwi a dhefolas ow thir, ha gul ow eretons tra gasadow.

⁸ Ny leveris an oferysi, ‘Ple ma an Arloedh?’ Ha ny'm aswonni an re a dhyght an lagha: an vugeledh ynwedh a dreuspassyas er ow fynn, ha'n brofoesi a brofoesas yn hanow Baal, ha kerdhes war-lergh taklow nag yw dhe les.

⁹ Rakhenna hwath my a bled genowgh, yn-medh an ARLOEDH, ha gans fleghes agas fleghes my a bled.

¹⁰ Rag tremenewgh ynysow Kittim, ha gweles; ha dannvenewgh bys Kedar, hag ombrederi yn tiwysyk, ha gweles mar peu bythkweth tra a'n par ma.

¹¹ A janjyas kenedhel hy duwow, kyn na vons duwow? Mes ow fobel re janjyas hy golewder rag an pyth nag yw dhe les.

¹² Bedhes euth genowgh, hwi nevow, orth hemma; perthewgh own bras, bedhewgh pur dhyegrys, yn-medh an Arloedh,

¹³ rag ow fobel re wrug dew dhrogedh; i re'm eskasas, an fenten a dhowrow bew, ha treghi yn-mes dowrarghow, dowrarghow terrys na yll synsi dowr.

¹⁴ Yw Ysrael servont? Yw ev keth genys tre? Prag yth yw ev devedhys ha bos preydh?

¹⁵ An lewyon yowynk a vedhyglas warnodho, hag usa: i re wastyas y dir: y sitys yw leskys, heb annedhyas.

¹⁶ Ynwedh mebyon Nof Tahpanhes re dorras kurun dha benn.

¹⁷ A ny wrussys dri hemma warnas dha honan, rag ty dhe eskasa an Arloedh dha Dhuw, pan esa orth dha hembronk y'n fordh?

¹⁸ Ha lemmyn pandr'a amont dhis mos y'n fordh dhe Ejyp, dhe eva dowrow Shihor? po pandr'a amont dhis mos y'n fordh dhe Assyria, dhe eva dowrow an avon?

¹⁹ Dha dhrogedh dha honan a'th keredh, ha'th weythresow dislel a'th chasti: godhvydh ytho ha gweles y vos drog ha hwerow, ty dhe eskasa an Arloedh dha Dhuw, ha ma nag eus ow own ynnos, yn-medh an Arloedh, Duw an luyow.

²⁰ Rag nans yw pell ty a dorras dha yew, ha tardha dha rawyow; ha ty a leveris, ‘Ny wrav vy servya’; rag war bub bre ughel hag yn-dann bub gwydhenn las ty a wandras, owth horya.

²¹ My a'th plansas avel gwinbrenn bryntin, yn tien a hasenn bur: fatell osta ytho treylys dhymm yn plans legrys, gwinbrenn estren?

²² Rag kynth omwolghydh gans natron, ha kemmeres dhis meur a sebon, hwath dha anewnder a bes avel mostenn a-ragov, yn-medh an Arloedh Duw.

²³ Fatell yllydh leverel, ‘Nyns ov defolys, nyns idh war-lergh Baalim’? Gwel dha fordh y'n nans, godhvydh an pyth a wrussys: kasek-kowrvargh skav ow poenya a-dro yn hy fordhow;

²⁴ kasek-asen gwyls usys dhe'n gwylvos, ow frikhwytha an gwyns yn hy flesour: pan yw hi leusik, piw a's fronn? Ny omskwith myns a's hwila; yn hy mis i a's kyv.

²⁵ Gwith dha droes rag bos dieskis, ha'th vryansenn rag syghes: mes ty a leveris, ‘Nyns eus govenek, rag my re garas estrenyon, ha war aga lergh yth av.’

²⁶ Dell vydh meth dhe'n ladher pan vydh kevys, yndellma y fydh meth dhe ji Ysrael: i, aga ruwyon, aga fennsevigyon, ha'ga oferysi, ha'ga frofoesi;

²⁷ neb a leverel dhe wydhenn, ‘Ty yw ow thas’; ha dhe ven, ‘Ty a'm dineythis.’ Rag i re dreylyas aga heyn dhymm, a-der aga fas: mes yn termyn aga ahwer i a lever, ‘Sev, ha saw ni.’

²⁸ Mes ple'ma dha dhuwow a wrussys dhe'th honan? Gas dhedha sevel, mar kyllons dha selwel yn termyn dha ahwer: rag war-lergh niver dha sitys yw dha dhuwow, A Yuda.

²⁹ Prag y krodhvolowgh warnav? Hwi oll re dreuspassyas er ow fynn, yn-medh an Arloedh.

³⁰ Yn euver my re weskis agas fleghes; ny dhegemmersons dyskybleth. Agas kledha agas honan re dhevoryas agas profoesi, avel lew ow tistrui.

³¹ A henedh, gwelewgh ger an Arloedh. A veuv gwylvos dhe Ysrael, po tir a dewlder? Ytho prag y lever ow fobel, ‘Ni yw rydh dhe wandra; ny dheun dhis namoy’?

³² A yll maghteth ankevi hy thegennow, po benyn bries hy gwisk? Mes ow fobel re'm ankovas, dydhyow heb niver.

³³ Fatell bareussys dha fordh yn ta dhe hwilas kerensa! Dhe venynes dhrog hogen ty re dhyskas dha fordhow.

³⁴ Ynwedh y'th lostennow y fydh kevys goes-bewnans an voghosogyon ankablus: ny's kevsys ow terri yn chiow. Mes yn spit dhe henna oll

³⁵ ty a lever, ‘Ankablus ov; yn sur y sorr a wra treylya a-dhiworthiv.’ Otta, my a wra dha vreusi, drefenn ty dhe leverel, ‘Ny beghis.’

³⁶ Prag yth yw trufel y'th wolok chanjya dha fordh? Ty a' fydh meth a Ejyp ynwedh, dell y'th o meth a Assyria.

³⁷ Ye, ty a wra mos yn-rag a-dhiworto, ha dha dhiwla war dha benn: rag an Arloedh re dhenaghas an re a drestydh ynna, ha ny sewenydh dredha.