Yeremia 19 - An Bibel Kernewek 20234 (Kernewek Kemmyn)

An Kostrel a Bri

¹ Yndellma y lever an Arloedh: Ke ha prena kostrel a bri dhiworth priweythor, ha kemmer genes re a henavogyon an bobel ha re a henavogyon an oferysi,

² ha ke yn-mes bys yn nans mab Hinnom usi ryb entrans Yet Darnow an Pottow Pri, ha dyllo ena an geryow a lavarav dhis,

³ ha lavar: Klewewgh ger an Arloedh, A vyghternedh Yuda, hag annedhysi Yerusalem. Yndellma y lever Arloedh an luyow, Duw Ysrael: Otta, my a dhre anfeusi war an tyller ma, may kosso diwskovarn neb a'n klew.

⁴ Drefenn i dhe'm forsakya, ha defola an tyller ma, ha leski offrynnow ynno dhe dhuwow erell, na aswonnsons i na aga thasow, na myghternedh Yuda, ha lenwel an tyller ma a woes tus wiryon.

⁵ Ynwedh i re dhrehevis tylleryow ughel dhe Baal, rag leski aga mebyon gans tan rag offrynnow leskys dhe Baal, tra na worhemmynnis, na kewsel, na ny dheuth y'm brys.

⁶ Ytho, otta, an dydhyow a dheu, yn-medh an Arloedh, ma na vydh gelwys na fella an tyller ma Tofeth, na nans mab Hinnom, mes nans an Ladhva.

⁷ Ha my a wra euver kusul Yuda ha Yerusalem y'n tyller ma; ha my a wra dhedha koedha gans an kledha a-rag aga eskerens, ha gans leuv an re a hwila aga bewnans; ha my a re aga horfow marow dhe vos boes rag ydhyn an nev, ha rag bestes an nor.

⁸ Ha my a wra an sita ma euth, ha hwibana; pubonan a's tremen a'n jeves marth ha gul ges drefenn oll hy flaow.

⁹ Ha my a wra dhedha dybri kig aga mebyon ha kig aga myrghes, hag i a dheber pub huni kig y gentrevek y'n esedhva, hag y'n ahwer may hwra aga eskerens ha'n re a hwila aga bewnans aga grevya.

¹⁰ Ena ty a derr an kostrel yn golok an wer hag a genes,

¹¹ ha ty a lever dhedha: Yndellma y lever Arloedh an luyow: Yndellma my a derr an bobel ma ha'n sita ma, dell derrir lester an priweythor, ma na vo nevra ewnhes: hag i a's ynkleudh yn Tofeth bys pan na vydh tyller dhe ynkleudhyas.

¹² Yndella my a wra dhe'n tyller ma, yn-medh an Arloedh, ha dh'y annedhysi, ha gul an sita ma avel Tofeth:

¹³ ha chiow Yerusalem, ha chiow myghternedh Yuda, a vydh defolys kepar ha tyller Tofeth, oll an chiow may losksons offrynnow war aga thohow dhe oll lu nev, ha dinewi offrynnow diwes dhe dhuwow erell.

¹⁴ Ena Yeremia a dheuth a-dhiworth Tofeth, le ma'n dannvonas an Arloedh dhe brofoesa; hag ev a sevis yn klos chi an Arloedh ha leverel dhe'n bobel oll:

¹⁵ Yndellma y lever Arloedh an luyow, Duw Ysrael: Otta, my a dhre war an sita ma hag oll hy threvow oll an drogedh re gewsis er hy fynn, drefenn i dhe galeshe aga hilbenn ma na glewvens ow geryow.