Yeremia 18 - An Bibel Kernewek 20234 (Kernewek Kemmyn)

Yeremia yn Chi an Priweythor

¹ An ger hag a dheuth dhe Yeremia a-dhiworth an Arloedh, ow leverel:

² ‘Sav, ha ke yn-nans dhe ji an priweythor, hag ena my a wra dhis klewes ow geryow.’

³ Ena my eth yn-nans dhe ji an priweythor, hag otta, yth esa owth oberi war an ros.

⁴ Mes an lester esa orth y wul a bri o difasys yn leuv an priweythor, ytho ev a'n gwrug arta, lester arall, dell hevelis da dhe'n priweythor.

⁵ Ena ger an Arloedh a dheuth dhymm, ow leverel:

⁶ A ny allav gul genes kepar ha'n priweythor ma, A ji Ysrael? yn-medh an Arloedh. Otta, par dell yw an pri yn leuv an priweythor, yndella yth owgh y'm leuv vy, A ji Ysrael.

⁷ Dhe unn prys my a gews a genedhel, hag a wlaskor, dh'y diwreydhya, dh'y therri dhe'n dor, ha dh'y distrui;

⁸ mar treyl an genedhel na, a gewsis er hy fynn, a-dhiworth hy drogedh, my a gyv edrek a'n drogedh a vynnis y wul dhedhi.

⁹ Ha dhe brys arall my a gews a genedhel, hag a wlaskor, dh'y drehevel ha dh'y flansa;

¹⁰ Mar kwra hi drogedh y'm golok, heb goslowes orth ow lev, ena my a gyv edrek a'n drogedh a vynnis y wul.

¹¹ Ha lemmyn ytho, kews orth gwer Yuda, hag orth annedhysi Yerusalem, ow leverel: Yndellma y lever an Arloedh: Otta, my a furv drogedh er agas pynn ha devisya towl er agas pynn: dehwelewgh peub a'y fordh dhrog ha gul dh'agas fordhow ha'gas gwriansow bos da.

Gorthter Ysrael

¹² Hag i a leveris, ‘Nyns eus govenek: ni a hol agan towlow agan honan, ha pub huni a wra herwydh gorthter y golonn dhrog.’

¹³ Rakhenna yndellma y lever an Arloedh: Govynnewgh yn mysk an kenedhlow, Piw re glewas traow a'n par ma? An wyrghes Ysrael re wrug tra pur euthyk.

¹⁴ A wra ergh Lebanon gasa karrek an gwel? Po a wra dowrow an menydhyow pell desygha, an goverow yeyn ow resek?

¹⁵ Mes ow fobel re'm ankovas, i a lesk offrynnow dhe dhuwow koeg neb a wrug dhedha trebuchya yn aga fordhow, y'n hynsyow koth, dhe gerdhes yn hynsyow nag yns drehevys yn-bann,

¹⁶ ow kul aga thir tra euthyk, ha ges bys vykken. Pubonan neb a dremen a vydh skruthys, hag a shak y benn.

¹⁷ Avel gwyns an duryen my a's tewl a-les a-rag an eskar; my a dhiskwedh dhedha ow heyn, yn le ow fas, yn dydh aga therroes.

Bras erbynn Yeremia

¹⁸ Ena i a leveris, ‘Dewgh, ha tewlel towlow erbynn Yeremia; rag ny vydh kellys an lagha dhiworth an oferyas, na kusul dhiworth an re fur, na'n ger dhiworth an profoes. Dewgh ha'y weskel gans an taves, ha na woslowyn dhe nagonan a'y eryow.’

¹⁹ Goslow orthiv, A Arloedh, ha klew lev ow erbynnoryon.

²⁰ A vydh drogedh attylys rag da? Rag i re balasas pytt rag ow enev. Porth kov my dhe sevel a-ragos dhe gewsel da ragdha, dhe dreylya dha sorr a-dhiworta.

²¹ Ytho ro aga fleghes dhe'n divoetter, ha'ga delivra dhe nerth an kledha; ha re wrello aga gwragedh kelli aga fleghes, ha'ga gwer bos gorrys dhe'n mernans; ha'ga gwer yowynk ledhys gans an kledha yn batel.

²² Re bo klewys kri a'ga chiow, pan dhredh bagas a soudoryon warnedha a-dhistowgh: rag i re balasas pytt dhe'm kachya, ha kudha maglennow rag ow threys.

²³ Byttegyns, Arloedh, ty a woer oll aga husul er ow fynn dhe'm ladha. Na av aga hammweyth, na dilea aga fegh a'th wolok, mes gas i dhe vos domhwelys a-ragos. Gwra aga dyghtya yn termyn dha sorr.