Yeremia 1 - An Bibel Kernewek 20234 (Kernewek Kemmyn)

¹ Geryow Yeremia mab Hilkia, onan a'n oferysi esa yn Anathoth yn pow Benyamin,

² may teuth dhodho ger an Arloedh yn dydhyow Yosia mab Amon myghtern Yuda, yn trydhegves blydhen y reyn.

³ Y teuth ynwedh yn dydhyow Yehoyakim mab Yosia myghtern Yuda, bys yn diwedh unnegves blydhen Sedekia mab Yosia myghtern Yuda, bys yn kethneth Yerusalem y'n pympes mis.

Galow Yeremia

⁴ Ger an Arloedh a dheuth dhymm, ow leverel,

⁵ ‘Kyns my dhe'th formya y'n dorr my a'th aswonnis; ha kyns ty dhe dhos yn-mes a'n brys my a'th sakras, ha'th worra dhe vos profoes dhe'n kenedhlow.’

⁶ Ha my a leveris, ‘Ogh Arloedh DUW, otta, ny wonn kewsel, rag yowynk ov.’

⁷ Ha'n Arloedh a leveris dhymm, ‘Na lavar “Yowynk ov”; mes mos a wredh dhe biwpynag may hwrylliv vy dha dhannvon dhodho, ha ty a lever pypynag a worhemmynniv dhis.

⁸ Na borth own a-ragdha, rag yth esov genes, dhe'th telivra, yn-medh an Arloedh.’

⁹ Ha'n Arloedh a ystynnas y leuv ha tochya ow ganow. Hag yn-medh an Arloedh dhymm, ‘Awotta, my re worras ow geryow y'th hanow.

¹⁰ Mir, my re'th apoyntyas hedhyw war an kenedhlow ha war an gwlaskordhow, dhe dhiwreydhya, ha dhe derri dhe'n dor, dhe dhistrui, ha dhe dhiswul; dhe dhrehevel ha dhe blansa.’

¹¹ Ger an Arloedh a dheuth dhymm, ow leverel, ‘Yeremia, pandr'a welydh?’ Ha my a leveris, ‘My a wel gwelenn a wydhenn alamand.’

¹² Ena an Arloedh a leveris dhymm, ‘Ty re welas yn ta: rag my a wra goelyas war ow ger dh'y wrythya.’

¹³ Ha ger an Arloedh a dheuth dhymm y'n nessa prys, ow leverel, ‘Pandr'a welydh?’ Ha my a leveris, ‘My a wel kalter ow pryjyon; ha'n fas anodho yma dhe'n gogledh.’

¹⁴ Ena an Arloedh a leveris dhymm: Yn-mes a'n gogledh tebeledh a wra tardha war oll annedhysi an tir.

¹⁵ Rag, otta, my a wra gelwel oll teyluyow gwlaskordhow an gogledh, yn-medh an Arloedh; hag i a wra dos, hag i a wra settya pubonan y dron dhe entrans yetow Yerusalem, hag erbynn an fosow anedhi a-derdro, hag erbynn sitys oll Yuda.

¹⁶ Ha my a lever ow breusow er aga fynn drefenn aga sherewynsi; rag i re'm eskasas, ha re loskas offrynnow dhe dhuwow erell, ha gordhya oberow aga diwla aga honan.

¹⁷ Ty ytho grogys dha dhiwglun, ha sevel, ha kewsel dhedha pup-tra a worhemmynnav dhis: na vydh ownek a-ragdha, ma na'th ownekhav a-dheragdha.

¹⁸ Rag, otta, my re'th wrug y'n jydh ma sita gerys, ha koloven a horn, ha fosow a vrons erbynn an tir kowal, erbynn myghternedh Yuda, erbynn aga fennternedh, erbynn aga oferysi, hag erbynn pobel an tir.

¹⁹ 1 Hag i a wra omladh er dha bynn; mes ny wrons fetha; rag my a vydh genes, yn-medh an Arloedh, dhe'th telivra.