Titus 2 - An Bibel Kernewek 20234 (Kernewek Kemmyn)

Dyski Dyskas Yagh

¹ Mes ty, lavar an pyth a dhelledh dhe dhyskas yagh,

² tus koth dhe vos divedhow, sad, fur, yagh yn fydh, yn kerensa, hag yn perthyans.

³ Y'n keth vaner lavar dhe'n benynes koth mayth omdhokkons dell dhegoedh dhe sansoleth heb sklandra, heb bos kethesow dhe veur a win, mes dyskadoresow a'n pyth yw da,

⁴ may tyskons an benynes yowynk dhe gara aga gour ha'ga fleghes,

⁵ dhe vos fur, chast, bysi y'n chi, gostydh orth aga gour i, ma na vo ger Duw despitys.

⁶ Y'n keth vaner gwra keski an wer yowynka may fons fur.

⁷ Yn pup-tra omdhiskwa yn patron gwriansow da, glander y'th tyskas, sevureth,

⁸ kows yagh, divlam may fo eskar shamys heb kavoes travyth drog dhe leverel a-dro dhyn.

⁹ Gwra keski kethwesyon may fons gostydh dh'aga mestrysi yn pup-tra, dhe blegya yn ta heb dadhel,

¹⁰ heb ladra, mes ow tiskwedhes pub lelder da, mayth afinnons dyskas Duw agan Selwador yn pup-tra.

¹¹ Rag gras Duw re omdhiskwedhas, ow tri selwyans dhe bub den oll

¹² orth agan dyski may hwryllyn hepkorr ansansoleth ha drokhwansow an bys, ha bewa gans doethter, gwiryon ha sans y'n oes ma,

¹³ ow kortos an govenek gwynnvys ha'n omdhiskwedhyans a'n splannder a'n Duw meur ha'gan Selwador Krist Yesu,

¹⁴ neb a omros ragon ni may hwrella agan dasprena dhiworth pub ober dilagha ha glanhe ragdho pobel dh'y berghennogeth y honan, diwysyk yn gwriansow da.

¹⁵ Gwra derivas an taklow ma, hag ynnia ha keredhi gans pub awtorita. Na wres denvyth dha dhispresya.