Titus 1 - An Bibel Kernewek 20234 (Kernewek Kemmyn)

Salusyans

¹ Powl, gwas Duw hag abostol Yesu Krist, war-lergh fydh an re yw dewisys gans Duw hag aswonnvos an gwir yw yn akord gans sansoleth,

² yn govenek bewnans heb worfenn a ambosas Duw, neb na wowlever, kyns termyn heb worfenn.

³ Ev a dhiskwedhas y er y'n termyn gwiw dre bregoth a veu gorrys y'm charj war-lergh gorhemmynn Duw agan Selwador,

⁴ Dhe Titus, ow gwir flogh war-lergh an fydh yw rynnys genen: Gras ha kres dhiworth Duw an Tas ha Krist Yesu agan Selwador.

Ober Titus yn Kreta

⁵ Rakhenna my a'th hasas yn Kreta mayth ordennes an taklow erell hag apoyntya henavogyon yn pub tre, dell erghis vy dhis,

⁶ nebonan heb defowt, gour unn wreg gans fleghes a grys, heb kuhudhans a vewnans avlan na direwl.

⁷ Rag y koedh dhe'n epskop bos divlam, avel rennyas Duw, heb gorthter, na sorr skav, nag yw omres dhe win, nag yw striver na kraf,

⁸ mes hel, karer dader, doeth, ewnhynsek, sans, omrewlys,

⁹ ow synsi an ger len war-lergh an dyskas may hallo ha keski der an dyskas yagh ha konkludya an re a gews er y bynn.

¹⁰ Rag yma lies den heb rewl a gews yn euver hag yn hwowek, dres oll tus an trodreghyans.

¹¹ Res yw gul tewel dhedha, neb a dhomhwel teyluyow dien ow tyski dhedha taklow na dhegoedh rag krefni plos.

¹² Yn-medh onan anedha i, onan aga frofoesi i, ‘Tus Kreta yw pup-prys gowleverysi, drog vestes, kowlogyon dhiek.’

¹³ Gwir yw an dustuni ma. Rakhenna, gwra aga heredhi yn tynn may fons i yagh y'n fydh,

¹⁴ heb gul vri a hwedhlow yedhowek na gorhemmynnow tus a skon an gwir.

¹⁵ Pup-tra yw glan dhe'n re yw glan, mes dhe'n re yw legrys ha diskryjyk, nyns yw travyth glan, mes legrys yw ha'ga brys ha'ga howses.

¹⁶ I a lever i dhe aswonn Duw, mes yn aga gwriansow i a'n nagh. Kasadow ha diwostydh yns i hag anwiw rag pub gwrians da.