Sefania 2 - An Bibel Kernewek 20234 (Kernewek Kemmyn)

Galow dhe Edrega

¹ Omguntellewgh war-barth, omguntellewgh, a genedhel dhiveth;

² kyns an arghadow dhe vos dineythys, kyns an jydh dhe dremena avel kulyn, kyns sorr fers an Arloedh dhe dhos warnowgh, kyns dydh sorr an Arloedh dhe dhos warnowgh.

³ Hwilewgh an Arloedh, hwi oll, tus uvel an norvys neb re wrug y vreus; hwilewgh ewnder, hwilewgh uvelder: martesen hwi a vydh gwithys yn dydh sorr an Arloedh.

Breus erbynn Eskerens Yuda

⁴ Rag Gaza a vydh forsakys hag Ashkelon difeythtir: tus Ashdod a vydh chasyes dhe-ves dhe hanter-dydh, hag Ekron a vydh diwreydhys.

⁵ Go-i trigoryon an arvor, kenedhel an Kerethysi! Ger an Arloedh yw er agas pynn: A Kanan, bro an Filistysi, my a'th tistru ma na vydh triger gesys.

⁶ Ha'n arvor a vydh peurvaow, prasow bugeledh, ha korlannow rag greow.

⁷ Ha'n arvor a vydh rag remenant chi Yuda; i a wra aga greow dhe beuri warnodho: yn chiow Ashkelon i a wrowedh gorthugherweyth; rag an Arloedh, aga Duw, a wra aga visitya, ha treylya aga hethneth.

⁸ My re glewas skorn Moab ha despit an Ammonysi may skornsons ow fobel, ha gul godrosow bras erbynn aga or.

⁹ Rakhenna ren ow bewnans, yn-medh Arloedh an luyow, Duw Ysrael, y fydh Moab kepar ha Sodom yn surredi, ha an Ammonysi kepar ha Gomorra, hwennek ha poll hoelan ha difeyth a bes vynitha: remenant ow fobel a's pyll, ha'n re gesys a'm kenedhel a erit aga thir.

¹⁰ Hemma a's tevydh drefenn aga goeth, drefenn i dhe skornya hag omvoghhe erbynn pobel Arloedh an luyow.

¹¹ Euthyk vydh an Arloedh dhedha: rag ev a danowha oll duwow an norvys ha tus a'n gordh, peub dhiworth y le, oll ynysow an kenedhlow.

¹² Hwi, A Kushysi ynwedh – i a vydh ledhys gans ow kledha.

¹³ Hag ev a ystynn y leuv erbynn an kledh ha distrui Assyria, ha gul Nineve yn difeyth, sygh kepar ha'n gwylvos.

¹⁴ Ha greow a wrowedh y'n kres anedhi, oll bestes an kenedhlow: an oula kornek ha'n klabytter a annedh yn pennow hy filars; aga lev a gan y'n fenestri; diswrians a vydh y'n treudhowyow: rag ev a lommha an parosweyth keder.

¹⁵ Hemm yw an sita heudh a vewa gans diagha, a leveris yn hy holonn, ‘Ottavy, ha nyns eus denvyth marnas my.’ Ass yw hi gyllys yn difeyth, growedhva rag bestes! Pubonan a dremen dresti a hwiban ha shakya y leuv.