Salmow 98 - An Bibel Kernewek 20234 (Kernewek Kemmyn)

Salm.

¹ Kenewgh dhe'n Arloedh kan nowydh, rag ev re wrug marthusyon. Y leuv dhyghow ha'y vregh sans re wrug budhogoleth ragdho.

² An Arloedh re dherivas y selwyans; ev re dhiskwedhas y ewnder yn golok an kenedhlow.

³ Ev re borthas kov a'y dregeredh ha'y lelder orth chi Ysrael. Oll pennow an norvys re welas selwyans agan Duw.

⁴ Gwra tros heudhik dhe'n Arloedh, oll an nor; kenewgh, ha germewgh gans joy, ha kenewgh gormola.

⁵ Kenewgh gormola dhe'n Arloedh gans an sowtri, gans an sowtri ha lev salm.

⁶ Gans tollgern ha son trompa, gwrewgh tros heudhik a-rag an Myghtern, an Arloedh.

⁷ Tarennes an mor ha myns eus ynno; an norvys ha myns eus trigys ynno.

⁸ Takyes an livow diwleuv; garmes an menydhyow war-barth yn lowen

⁹ a-dherag an Arloedh, rag ev a dheu dhe vreusi an norvys. Ev a vreus an norvys gans gwiryonedh, ha'n poblow gans ewnder.