Salmow 93 - An Bibel Kernewek 20234 (Kernewek Kemmyn)

¹ An Arloedh yw Myghtern, ev re omwiskas yn splannder; an Arloedh re omwiskas hag yma grogys a nerth a-dro dhodho. An norvys devri yw fastys, ma na yllir y dhisevel.

² Dha se a veu fastys bythkweth; ty re beu, trank heb worfenn.

³ An livow re dhrehevis, A Arloedh, an livow re dhrehevis aga lev; an livow a dhrehav aga thonnow.

⁴ Kreffa ages dowrow meur, kreffa ages an mordonnow, yw an Arloedh, galloesek y'n ughelder.

⁵ Dha dhustuniow, A Arloedh, yw fest sur; sansoleth a dhelledh dhe'th chi, A Arloedh, bynitha.