Salmow 92 - An Bibel Kernewek 20234 (Kernewek Kemmyn)

Salm. Kan rag dydh an Sabot.

¹ Da yw grassa dhe'n Arloedh, ha kana gormola dhe'th hanow, an Ughella,

² ow terivas dha dregeredh myttinweyth, ha'th lelder nosweyth,

³ War dhaffar a dheg kordenn ha war an delynn, war an sowtri hweg y don.

⁴ Rag ty, A Arloedh, re'm heudhhas dre dha wriansow, orth ober dha dhiwleuv my a arm yn lowen.

⁵ A Arloedh, ass yw meur dha oberow! Pur dhown yw dha brederow.

⁶ Ny woer gour talsogh, ha ny gonvedh den foll hemma.

⁷ Pan las an debeles avel an gwels, ha pan sewen oll an dhrogoberoryon, ena y fydhons diswrys bynnari;

⁸ mes yth esos yn ughelder bys vykken, A Arloedh.

⁹ Rag otta, dha eskerens, A Arloedh, otta, dha eskerens a dhe goll, ha diberthys vydh oll an dhrogoberoryon.

¹⁰ Mes ty re ughelhas ow horn avel korn an ojyon gwyls; ty re'm untyas gans oyl yr.

¹¹ Ow lagas ynwedh a wel ow mynnas war ow eskerens; ha'm diwskovarn a glew ow mynnas a'n debeles a sev er ow fynn.

¹² An den gwiryon a las avel an balmwydhenn, hag ev a dyv avel kederwydhenn yn Lebanon.

¹³ An re yw plynsys yn chi an Arloedh, a las yn klosyow agan Duw.

¹⁴ I a dheg frut hwath yn aga hothni, hag y fydhons yr ha glas,

¹⁵ rag may teriffons an Arloedh dhe vos ewnhynsek; ow harrek yw ev, ha nyns eus kammhynseth ynno.