Salmow 90 - An Bibel Kernewek 20234 (Kernewek Kemmyn)

LYVER IV

Pysadow a Moyses, gour Duw.

¹ A Arloedh, ty re beu agan skovva a unn henedh dhe'n nessa.

² Kyns an menydhyow dhe vos dineythys, po kyns ty dhe formya an tir ha'n norvys, trank heb worfenn ha bys vykken, ty yw Duw.

³ Ty a dreyl den arta dhe dhoust, hag a lever, ‘Dehwelewgh, hwi vebyon den.’

⁴ Rag mil vlydhen y'th wolok jy yw kepar ha dydh pan yw passyes, ha kepar ha goelyas y'n nos.

⁵ Ty a worr diwedh dhedha avel dhe hunros; y'n myttin yth yns avel gwels ow tevi.

⁶ Y'n myttin ev a las ha tevi, mes y'n gorthugher ev a grin ha gwedhra.

⁷ Rag ni a dhe goll y'th sorr, yth on ni dyegrys drefenn dha gonnar.

⁸ Ty re worras agan kammweythresow a-dheragos, ha'gan peghosow kudh yn golow dha fas.

⁹ Rag oll agan dydhyow a dremen yn-dann dha sorr; ni a dhre agan blydhynyow dhe benn kepar ha hanas.

¹⁰ Dydhyow agan blydhynyow yw deg blydhen ha tri-ugens; po dre reson krevder peswar-ugens blydhen, byttegyns nyns yw aga nerth marnas poenvos hag ahwer; rag hware y hedh, ha gyllys on ni dhe goll.

¹¹ Piw a aswonn nerth dha sorr, ha'th koler, mar vras dell yw an own ahanas?

¹² Yn kettella dysk dhyn nivera agan dydhyow, may treyllyn agan kolonn dhe furneth.

¹³ Dehwel, A Arloedh; pygemmys prys? Bydh truedhek orth dha wesyon.

¹⁴ Lanw ni y'n myttin a'th tregeredh, may kriyn yn lowen ha bos heudhik oll agan dydhyow.

¹⁵ Lowenha ni herwydh an dydhyow may grevsys dhyn, ha'n blydhynyow may hwelsyn drog.

¹⁶ Bedhes dha wriansow apert dhe'th wesyon, ha'th splannder dh'aga fleghes.

¹⁷ Ha bedhes favour an Arloedh agan Duw warnan ni, ha fast ober agan diwleuv warnan, fast ober agan diwleuv.