Salmow 89 - An Bibel Kernewek 20234 (Kernewek Kemmyn)

Maskil a Ethan an Esrahyas.

¹ My a gan a dregeredhow an Arloedh bynitha; gans ow ganow y terivav dha lelder a unn henedh dhe'n nessa.

² Rag my re leveris, bos tregeredh drehevys bynitha; dha lelder a fastydh y'n nevow.

³ ‘My re wrug kevambos gans an den dewisys genev, my re dos dhe Davydh ow gwas:

⁴ “Dha has a fastyav bynitha, ha'th se a dhrehavav a unn henedh dhe'n nessa.” ’ Sela.

⁵ Ha'n nevow a wormel dha varthusyon, A Arloedh, dha lelder ynwedh yn kuntelles an syns.

⁶ Rag piw y'n nevow a yll bos kehaval dhe'n Arloedh? Piw yn mysk mebyon an duwow a yll bos haval dhe'n Arloedh?

⁷ Ownys yw Duw yn kuntelles an syns; pur euthyk a-ugh oll an re usi yn y gyrghynn.

⁸ A Arloedh, Duw an luyow, piw yw galloesek avelos jy, A Arloedh? Yma dha lelder a-dro dhis.

⁹ Ty a rewl hwythfians an mor. Pan sev y donnow, ty a's koselha.

¹⁰ Ty re vrewis Rahab dhe eneworres; ty re skattras dha eskerens gans nerth dha vregh.

¹¹ Yma an nevow dhiso jy, yma an nor ynwedh dhiso jy; an norvys ha pup-tra eus ynno, ty re's selyas.

¹² An kledh ha'n dyghow, ty re's formyas; Tabor ha Hermon a gri yn lowen y'th hanow.

¹³ Yma dhis bregh alloesek; nerthek yw dha leuv, hag ughel yw dha leuv dhyghow.

¹⁴ Ewnder ha gwirvreus yw sel dha se; tregeredh ha gwirder a a-dherag dha fas.

¹⁵ Gwynnvys an bobel a aswonn an arm heudhik, neb a gerdh, A Arloedh, yn golow dha fas.

¹⁶ I a lowenha y'th hanow oll an jydh, hag y'th ewnder y fydhons ughelhes.

¹⁷ Rag ty yw glori aga nerth, hag y'th vodh da y trehevydh agan korn.

¹⁸ Rag an Arloedh Duw yw agan skoes, ha Sans Ysrael yw agan Myghtern.

¹⁹ Yn termyn passys y kewssys orth dha syns yn gwelesigeth, ha leverel: ‘My re worras gweres war onan galloesek; my re dhrehevis onan dewisys yn-mes a'n bobel.

²⁰ My re gavas Davydh ow gwas; gans ow oyl sans my re'n untyas.

²¹ Ow leuv a'n menten, ha'm bregh ynwedh a'n krevha.

²² Ny drygh an eskar warnodho, ha ny'n pystik mab sherewneth.

²³ Ha my a vrew y eskerens a-dheragdho ha'n re a'n kas my a's gwysk.

²⁴ Mes ow lelder ha'm tregeredh a vydh ganso; hag y'm hanow vy y fydh y gorn ughelhes.

²⁵ Ha my a sett y leuv y'n mor ha'y leuv dhyghow y'n avonyow.

²⁶ Ev a elow warnav, “Ow thas osta jy, ow Duw, ha karrek ow selwyans.”

²⁷ Ha my a'n gwra ow hynsa-genys, an ughella a vyghternedh an nor.

²⁸ My a with ow thregeredh orto bynitha, ha'm kevambos ganso a sev fast.

²⁹ My a wra dh'y has durya bys vykken, ha'y se avel dydhyow nev.

³⁰ Mar kwra y fleghes gasa ow lagha ha mar ny gerdhons y'm breusow,

³¹ mar terrons ow ordenansow ha ny synsons ow gorhemmynnow,

³² ena my a gessydh aga threuspass gans an welenn ha'ga hammweyth gans strokosow.

³³ Mes ny gemmerav ow thregeredh dhiworto, ha ny vydhav fals dhe'm lelder.

³⁴ Ny dorrav ow hevambos, ha ny dreylyav an ger a dheuth yn-mes a'm diwweus.

³⁵ Unnweyth re des vy re'm sansoleth; ny wowlavarav orth Davydh.

³⁶ Y has a dhur bys vykken, ha'y se a vydh avel an howl a-dheragov.

³⁷ Ev a vydh fastys avel an loer bynitha, hag avel dustuni len y'n nevow.’ Sela.

³⁸ Mes ty re dewlis dhe-ves ha skonya; ty re sorras orth dha Untys.

³⁹ Ty re skonyas an kevambos gans dha was; ty re dhefolas y gurun, orth hy thewlel dhe'n dor.

⁴⁰ Ty re dorras oll y geow ev; ty re wrug y dhinasow magoryow.

⁴¹ Oll an dremenysi a'n pyll; ev a dheuth ha bos skorn dh'y gentrevogyon.

⁴² Ty re dhrehevis leuv dhyghow y envi; ty re lowenhas oll y eskerens.

⁴³ Ty re dreylyas min y gledha, ha ny'n gessys dhe sevel y'n gas.

⁴⁴ Ty re dorras an welenn yn-mes a'y leuv, ha tewlel y se dhe'n dor.

⁴⁵ Ty re verrhas dydhyow y yowynkneth; ty re'n kudhas gans meth. Sela.

⁴⁶ Pygemmys prys, A Arloedh? A omgudhydh jy bynitha? A lesk dha sorr avel tan?

⁴⁷ Porth kov, A Arloedh, ass yw kott ow bewnans; a formsys oll mebyon den yn euver?

⁴⁸ Py gour a vew heb gweles ankow? A yll ev delivra y enev dhiworth leuv ifarn? Sela.

⁴⁹ Ple'ma dha dregeredhow koth, A Arloedh, an re a desys dhe Davydh y'th lelder?

⁵⁰ Porth kov, A Arloedh, a vewl dha wesyon, fatell borthav y'm askra despit an poblow;

⁵¹ An despit ganso may skornyas dha eskerens, A Arloedh, may skornsons olow dha Untys.

⁵² Benniges re bo an Arloedh bys vykken ha bynnari. Amen hag Amen.