Salmow 88 - An Bibel Kernewek 20234 (Kernewek Kemmyn)

Kan. Salm a vebyon Koragh. Dhe vester an keur: war Mahalath Leannoth. Maskil a Heman an Esrahyas.

¹ A Arloedh Duw ow selwyans, my re armas dydh ha nos a-dheragos.

² Des ow fysadow a-dheragos; pleg dha skovarn dhe'm kri.

³ Rag leun yw ow enev a boenvos, ha'm enev a dheu nes dhe ifarn.

⁴ Reknys ov vy yn mysk an re a dhiyskynn dhe'n pytt; yth ov vy kepar ha gour heb nerth,

⁵ gesys yn mysk an re varow, kepar ha'n re ledhys neb a wrowedh y'n bedh, na berthydh kov anedha namoy, ha diberthys yns i dhiworth dha leuv.

⁶ Ty re'm gorras y'n pytt isella, yn tylleryow tewl, hag yn downderyow.

⁷ Dha gonnar yw poes warnav, ha ty re dhros warnav oll dha donnow. Sela.

⁸ Ty re bellhas dhiworthiv oll an re aswonnys genev; ty re'm gwrug kasadow dhedha. Prisonys yn fast ov vy, ma na allav diank;

⁹ ow lagas a fyll dre dhuwon. A Arloedh, my a elwis warnas pub dydh, my re ystynnas ow diwleuv dhis.

¹⁰ A dhiskwedhydh marthusyon dhe'n re varow? A dhassergh spyrysyon an re varow dhe'th wormel? Sela.

¹¹ A vydh dha dregeredh disklerys y'n bedh, po dha lelder yn Abaddon?

¹² A vydh dha varthusyon aswonnys y'n tewolgow, ha'th ewnder yn tir ankov?

¹³ Mes my a gri dhis rag gweres, A Arloedh; hag y'n myttin y teu ow fysadow a-dheragos.

¹⁴ Prag, A Arloedh, y skonydh ow enev? Prag y kudhydh dha fas ragov?

¹⁵ Truan veuv ha parys dhe verwel dhiworth ow yowynkneth; my re borthas own ahanas, hag yn desper ov vy.

¹⁶ Dha gonnar res eth dresov; own ahanas re'm distruis.

¹⁷ I a dheuth a-dro dhymm oll an jydh avel dowr; i a omsettyas a-dro dhymm a bub tu.

¹⁸ Karer ha koweth a bellhasys dhiworthiv, hag yma ow aswonnesigyon yn tewlder.