Salmow 83 - An Bibel Kernewek 20234 (Kernewek Kemmyn)

Kan. Salm a Asaf.

¹ Na daw, A Dhuw, na omdenn, ha na bowes, A Dhuw.

² Rag otta, dha eskerens a wra tros; ha'n re a'th kas re dhrehevis aga fenn.

³ I a dewlis towlow fel erbynn dha bobel, hag omgusulya erbynn dha dus tresorys.

⁴ I re leveris, ‘Dewgh, ha'ga hisya, ma na vons kenedhel, ha ma na vo hanow Ysrael yn kovadh namoy.’

⁵ Rag i re omgusulyas keskolonn; i re wrug kevambos er dha bynn;

⁶ Tyldow Edom ha'n Yshmaelysi, Moab ha'n Hagrysi;

⁷ Gebal, hag Ammon, hag Amalek, Filistia ha'n re usi trigys yn Tyr.

⁸ Asshur ynwedh re junyas gansa; i re weresas dhe vebyon Lot. Sela.

⁹ Gwra dhedha i dell wrussys dhe Midyan, dhe Sisera ha dhe Yabin orth nans Kishon;

¹⁰ neb a verwis yn Endor, ha dos ha bos avel teyl rag an dor.

¹¹ Gwra aga bryntinyon avel Oreb ha Zeeb, oll aga fennsevigyon avel Zebagh ha Salmunna;

¹² Neb a leveris, ‘Kemmeryn ni yn agan perghennogeth peurvaow Duw.’

¹³ A Dhuw, gwra i avel has askall, avel kulyn a-rag an gwyns.

¹⁴ Kepar ha tan a lesk an koes, ha kepar ha flamm a worr tan y'n menydhyow,

¹⁵ yn kettella helgh i gans dha annawel ha browegh i gans dha dewedh.

¹⁶ Lanw aga fasow a dhisenor, may hwillons dha hanow, A Arloedh.

¹⁷ Perthens i meth ha bedhens dyegrys bys vykken; bedhens i disenorys, ha mos dhe goll.

¹⁸ Ena i a wodhvydh ty dha honan neb yw dha hanow an Arloedh dhe vos an Ughella dres oll an nor.