Salmow 81 - An Bibel Kernewek 20234 (Kernewek Kemmyn)

Dhe vester an keur: war an Gittith. A Asaf.

¹ Kenewgh yn lowen dhe Dhuw agan nerth; gwra tros heudhik dhe Dhuw Yakob.

² Gwrewgh dhe'n menestrouthi seni, gweskewgh an tabourik, an sowtri hweg gans an delynn.

³ Hwythewgh an trompa y'n loer nowydh, y'n loer leun, yn agan dy'goel.

⁴ Rag hemm yw ordenans dhe Ysrael, ha lagha a Dhuw Yakob.

⁵ Ev a erghis hemma yn Yosep rag dustuni, pan dheuth yn-mes a bow Ejyp. My a glew yeth na wrav hy godhvos ow leverel,

⁶ ‘My a dhifresas y skoedh a'n begh; y dhiwleuv a veu delivrys dhiworth an ganstell.

⁷ Ty a elwis yn anken ha my a'th telivras; my a worthybis dhis yn keladow an daran; my a'th provas orth dowrow Meriba. Sela.

⁸ Klew, ow fobel, ha my a dheg dustuni dhis; A Ysrael, unnweyth a koslewes orthiv!

⁹ Ny vydh ynnos duw astranj, ha ny wordhydh duw estren.

¹⁰ My yw an Arloedh dha Dhuw, a'th tug jy yn-mes a bow Ejyp. Igor dha anow a-les, ha my a'n lenow.

¹¹ ‘Mes ny woslowas ow fobel orth ow lev, hag Ysrael a'm skonyas.

¹² Ytho my a's gasas dh'aga holonn worth, dhe gerdhes herwydh aga husulyow aga honan.

¹³ Unnweyth a koslowa ow fobel orthiv, hag Ysrael kerdhes yn ow fordhow vy!

¹⁴ Ena my a fethsa aga eskerens yn skon, ha treylya ow leuv erbynn aga envi.

¹⁵ An re a gas an Arloedh a omwrussa gostydh dhodho, ha'ga thermyn a via bys vykken.

¹⁶ Ha my a'th vagsa gans gwaneth a'n gwella, ha gans mel dhiworth an garrek my a'th lanwsa.’