Salmow 78 - An Bibel Kernewek 20234 (Kernewek Kemmyn)

Maskil a Asaf.

¹ Goslowewgh orth ow lagha, ow fobel; plegyewgh agas skovarn dhe lavarow ow ganow.

² My a iger ow ganow yn parabolenn, my a lever lavarow tewl a'n termyn koth;

³ an re a glewsyn hag a wodhven, hag a dherivas agan tasow dhyn ni.

⁴ Ny's kelyn rag aga fleghes, ow terivas dhe'n henedh a dheu gormola an Arloedh, y nerth ha'y varthusyon a wrug ev.

⁵ Rag ev a fastyas dustuni yn Yakob, hag a ros lagha dhe Ysrael a worhemmynnis dh'agan tasow, ma's deriffens orth aga fleghes;

⁶ ma's godhve an henedh a dho, an fleghes a vedha genys, rag may saffens ha'ga derivas dh'aga fleghes.

⁷ Rag may hworrens aga threst yn Duw ha ma nag ankoffens gwriansow Duw, mes gwitha y worhemmynnow;

⁸ Ha ma na vens avel aga thasow, henedh gorth ha dislen; henedh na veu fyrv aga holonn, ha nag esa aga spyrys len gans Duw.

⁹ Kepar ha mebyon Efraym, ervys hag ow toen gwaregow, neb a dreylyas aga heynow yn dydh an gas.

¹⁰ Ny synsons kevambos Duw, mes i a skonyas a gerdhes yn y lagha ev;

¹¹ Owth ankevi y wriansow ev, ha'y varthusyon a dhiskwedhsa orta.

¹² Taklow marthys a wrug ev yn golok agan tasow yn pow Ejyp, yn gwel Soan.

¹³ Ev a rannas an mor, hag a wrug dhedha tremena dredho; ev a wrug dhe'n dowrow sevel kepar ha graghell.

¹⁴ Ha dydhweyth ev a's hembronkas gans kommolenn, ha dres an nos gans golow tan.

¹⁵ Ev a folsas an karregi y'n difeyth, hag a ros diwes dhedha, kepar ha pan dheffa yn-mes a dhownderyow meur.

¹⁶ Ev a dhros frosow yn-mes a'n garrek hag a wrug dhe dhowrow dewraga kepar hag avonyow.

¹⁷ Byttegyns i a beghas dhe voy er y bynn, ha serri an Ughella y'n difeyth.

¹⁸ I a brovas Duw yn aga holonn, ow kovynn boes rag aga ewl.

¹⁹ Hag i a gewsis erbynn Duw, ow leverel, ‘A yll Duw pareusi moes y'n difeyth?

²⁰ Otta, ev a weskis an garrek may tewragas an dowrow, ha'n frosow a fennas. Mes a yll ev ri bara ynwedh, po darbari kig dh'y bobel?’

²¹ Ytho an Arloedh a glewas hemma, hag a sorras; tan o enowys yn Yakob, ha konnar a sordyas erbynn Ysrael,

²² drefenn na gryssons yn Duw na fydhya yn y selwyans ev.

²³ Ytho ev a worhemmynnis dhe'n kommol a-vann hag igeri darasow nev;

²⁴ hag ev a asas manna dhe goedha warnedha avel glaw, ma'n depprens, hag a ros dhedha ys an nevow.

²⁵ Ytho tus a dhybris bara eledh; ev a dhannvonas dhedha lanwes a voes.

²⁶ Ev a wrug dhe wyns an howldrevel hwytha y'n nevow, ha der y nerth ev a dhros gwyns an dyghow.

²⁷ Ev a wrug dhe gig koedha warnedha avel doust, hag ydhyn askellek kepar ha tewes an mor.

²⁸ Hag ev a asas dhedha koedha yn mysk aga thyldow, a-dro dh'aga annedhow.

²⁹ Ytho i a dhybris hag y fons lenwys yn ta, rag ev a ros dhedha an pyth a yeunsons.

³⁰ Mes kyns i dhe gavoes lowr a'n pyth a yeunsons, ha'n boes hwath yn aga ganow,

³¹ konnar Duw a dheuth warnedha, ha ladha an re vrassa anedha, ha gul dhe flour Ysrael koedha.

³² Yn despit dhe oll hemma, i a beghas hwath, ha ny gryssons yn y varthusyon ev.

³³ Rakhenna ev a wrug dh'aga dydhyow tremena yn euveredh ha'ga blydhynyow yn euth.

³⁴ Pan y's ladhas, i a'n hwilas; hag i a dreylyas ha hwilas Duw dihwans.

³⁵ Hag i a borthas kov Duw dhe vos aga harrek, ha Duw Ughella dhe vos aga dasprenyas.

³⁶ Byttegyns i a'n feklas gans aga ganow, hag a wowleveris dhodho gans aga thaves

³⁷ Rag nyns o aga holonn fast ganso, ha nyns ens i len yn y gevambos.

³⁸ Mes ev, leun a druedh, a avas aga hammweyth ha ny's distruis. Ha lieskweyth ev a dreylyas dhe-ves y sorr ha ny wrug dhe oll y gonnar difuna.

³⁹ Rag ev a borthas kov i dhe vos kig, gwyns a dremen, ha ny dhehwel.

⁴⁰ Ass wrussons i sevel lieskweyth er y bynn y'n difeyth ha grevya dhodho y'n gwylvos!

⁴¹ I a dreylyas, ha previ Duw yn aga holonn, ha paynya an Sans a Ysrael.

⁴² Ny borthsons kov a'y leuv, nag a'n jydh ma's dasprenas dhiworth an eskar;

⁴³ Fatell wrussa ev y doknys yn Ejyp, ha'y varthusyon yn gwel Soan.

⁴⁴ Ev a dreylyas aga goverow dhe woes, ha'ga frosow, ma nag effens anedha.

⁴⁵ Ev a dhannvonas hesow a gelyon yn aga mysk, a's devoryas, ha kwilkynyow, a's distruis.

⁴⁶ Ev a ros aga threvasow dhe'n pryv, ha'ga lavur dhe'n lokust.

⁴⁷ Ev a dhistruis aga gwinbrennyer gans keser, ha'ga sykaminwydh gans rew.

⁴⁸ Ev a asas aga gwarthek dhe'n keser, ha'ga flokkys dhe'n lughes.

⁴⁹ Ev a dhellos warnedha y sorr fers, sorr, ha koler, hag anken, ha dannvon tebel eledh yn aga mysk.

⁵⁰ Ev a dharbaris hyns dh'y sorr, ha ny withas aga enev rag ankow, mes ev a ros aga bewnans dhe'n pla;

⁵¹ Hag ev a weskis pub kynsa-genys yn Ejyp, kynsa frut aga nerth yn tyldow Ham.

⁵² Mes y bobel y honan, ev a's dros yn-mes avel deves, ha'ga ledya y'n difeyth avel flokk.

⁵³ Ev a's ledyas yn sawder, ma nag ownsons; mes an mor a gudhas aga eskerens.

⁵⁴ Ev a's dros dhe or y sentri, dhe'n menydh a brenas gans y leuv dhyghow.

⁵⁵ Hag ev a bellhas an kenedhlow a-dheragdha, hag a's rannas dhedha yn ertach, ha gul dhe loethow Ysrael triga yn aga thyldow i.

⁵⁶ Mes i a brovas hag a sorras Duw Ughella, ha ny synsons y dhustuniow;

⁵⁷ Mes i a gildennas hag omdhegi yn fals avel aga thasow; i a dreylyas a-denewen avel gwarak lows.

⁵⁸ Rag i a'n sorras gans aga thylleryow ughel, hag a wrug dh'y avi sevel der aga imajys gravys.

⁵⁹ Pan glewas Duw hemma, serrys veu, hag ev a dhispresyas Ysrael yn feur.

⁶⁰ Ytho ev a forsakyas an tabernakel yn Shilo, an tylda a worrsa yn mysk mab-den.

⁶¹ Ev a dhelivras y nerth dhe gethneth, y wolewder dhe leuv an eskar.

⁶² Hag ev a ros y bobel dhe'n kledha, hag a sorras orth y ertach.

⁶³ Tan a dhybris aga thus yowynk, ha ny veu aga maghtethyon res yn demmedhyans.

⁶⁴ Aga oferysi a veu ledhys gans an kledha, ha ny gynis aga gwedhwesow.

⁶⁵ Ytho an Arloedh a dhifunas avel onan ow sevel yn-mes a gosk, kepar ha breselyas ow karma wosa gwin.

⁶⁶ Ev a weskis y eskerens war-tu delergh, hag a ros disenor dhedha bynitha.

⁶⁷ Ev a skonyas tylda Yosep, ha ny dhewisas loeth Efraym;

⁶⁸ Mes ev a dhewisas loeth Yuda, menydh Sion, a gara.

⁶⁹ Hag ena ev a dhrehevis y sentri mar ughel avel an nevow, avel an nor re fastyas bynitha.

⁷⁰ Hag ev a dhewisas Davydh y was hag a'n kemmeras yn-mes a gorlannow an deves.

⁷¹ Ev a'n dros dhiworth an deves esa ow tena, dhe vaga Yakob y bobel hag Ysrael y ertach.

⁷² Ytho ev a's gwithas gans kolonn lan; hag ev a's bugelyas herwydh sleyghneth y dhiwleuv.