Salmow 77 - An Bibel Kernewek 20234 (Kernewek Kemmyn)

Dhe vester an keur: war Yeduthun. Salm a Asaf.

¹ My a elwis war Dhuw gans ow lev, war Dhuw y helwis gans ow lev, hag ev a ros skovarn dhymm.

² Yn dydh ow anken my a hwilas an Arloedh; ow leuv o ystynnys y'n nos, ha nyns o skwith; ow enev a skonyas a gavoes hebaska.

³ My a berth kov a Dhuw, ha moredhek ov vy; my a breder yn town, ha'm enev a glamder. Sela.

⁴ Ty a syns ow dewlagas yn tifunys; mar droblys ov vy ma na allav kewsel.

⁵ My re brederis a'n dydhyow koth, a'n blydhynyow usi tremenys seuladhydh.

⁶ My a berth kov a'm kan y'n nos; my a gews gans ow holonn, ha'm enev a hwila dihwans:

⁷ ‘A wra an Arloedh skonya bynitha, hag a ny vydh ev pes da nevra namoy?

⁸ A hedhis y dregeredh bynitha? A fyll y ambos a unn henedh hwila dihwans dhe'n nessa?

⁹ A ankovas Duw bos grassyes? A dhegeas ev y druedh yn sorr?’ Sela.

¹⁰ Ha my a leveris, ‘Hemm yw duwon dymm, leuv dhyghow an Ughella dhe vos treylys.’

¹¹ My a berth kov a wriansow an Arloedh; devri, my a berth kov a'th varthusyon kyns.

¹² My a breder ynwedh a'th oberow oll, ha my a gews a'th wriansow.

¹³ Dha fordh, A Dhuw, yw sans. Pana dhuw yw meur avel agan Duw ni?

¹⁴ Ty yw an Duw a wra marthusyon; ty re dherivas dha nerth yn mysk an bobel,

¹⁵ Gans dha vregh ty re brenas dha bobel, mebyon Yakob ha Yosep. Sela.

¹⁶ An dowrow a'th welas, A Dhuw, an dowrow a'th welas hag a borthas own; an downderyow ynwedh a grenas.

¹⁷ An kommol a dhiveris dowr, an nevow a wrug tros; dha sethow ynwedh a lughesis a-les.

¹⁸ Lev dha daran esa y'n korwyns; an lughes a wolowis an norvys; an nor a dhegrenas ha krysya.

¹⁹ Yma dha fordh y'n mor, ha'th hynsyow y'n dowrow meur; ha nyns yw olow dha dreys aswonnys.

²⁰ Ty a hembronk dha bobel avel deves dre leuv Moyses hag Aron.