Salmow 75 - An Bibel Kernewek 20234 (Kernewek Kemmyn)

Dhe vester an keur: Al Tashheth. Salm a Asaf. Kan.

¹ Ni a woer gras dhis, A Dhuw, ni a woer gras; ogas yw dha hanow. Tus a dheriv dha varthusyon.

² ‘Y'n prys apoyntys my a vreus gans ewnder.

³ An nor a deudh ha myns eus trigys ynno; my yw neb a fast y golovenyow.’ Sela.

⁴ My a leveris dhe'n re woethus, ‘Na vostyewgh’, ha dhe'n debeles, ‘Na dhrehevewgh agas korn.

⁵ Na dhrehevewgh agas korn mar ughel, ha na gewsewgh howtyn dha gonna.’

⁶ Rag nyns yw dhiworth an howldrevel na dhiworth an worlewin, na dhiworth an difeyth, y teu eksaltyans.

⁷ Mes Duw yw an breusyas; ev a iselha unn den hag ughelhe den arall.

⁸ Rag yn leuv an Arloedh yma hanaf, hag ewynek yw an gwin, kemmyskys yn leun, hag ev a dhinwa anodho. Mes an godhes anodho, oll tebeles an nor a'n lenk ha'y eva.

⁹ Mes my a'n deriv bynitha, ha kana gormola dhe Dhuw Yakob.

¹⁰ Oll kern an debeles a droghav dhe-ves, ha kern an re wiryon a vydh ughelhes.