Salmow 65 - An Bibel Kernewek 20234 (Kernewek Kemmyn)

Dhe vester an keur. Salm a Davydh. Kan.

¹ Y tegoedh dha wormel, A Dhuw, yn Sion, ha dhiso jy y fydh an ambos kollenwys.

² Ty neb a woslow orth pysadow, dhiso jy y teu pub kig.

³ Kammweythresow yw re grev ragov; agan kammwriansow ni, ty a's glanha.

⁴ Gwynnvys an den a dhewisydh hag a dhredh nes dhis, may trykko y'th klosyow; ni a vydh lenwys a dhader dha ji, ha'th tempel sans.

⁵ Ty a worthyp dhyn gans taklow euthyk yn ewnder, A Dhuw agan selwyans; ty, neb yw fydhyans oll pennow an nor, ha'n re usi pell war an mor.

⁶ Der y nerth y hwra ev fastya an menydhyow; yma grogys a alloes a-dro dhodho.

⁷ Ev a spavennha tros an mor, tros an mordonnow ha freudh an poblow.

⁸ Ynwedh an re a drig yn pella sornow an nor a berth own a'th toknys; ty a wra dhe borthow an bora ha'n gorthugher kana gormola.

⁹ Ty a vir orth an nor ha'y dhowra, ty a wra dh'y feythter ynkressya; avon Duw yw leun a dhowr; ty a brovi ys ragdha, rag yndella ty re'n darbaris.

¹⁰ Ty a dhowrha y fynnglow, ha levenhe y ryllow, ty a'n medhelha gans kowasow, ha benniga y eginyow.

¹¹ Ty a gurun an vlydhen gans dha dhader, ha'th fordhow a dhever gans feythter.

¹² Peurvaow an difeyth a dhever, ha'n bronnow yw grogysys gans lowender.

¹³ An peurvaow re omwiskas gans flokkys, an nansow re omgwethas gans ys, i a arm gans lowender, ha kana.