Salmow 63 - An Bibel Kernewek 20234 (Kernewek Kemmyn)

Salm a Davydh, pan esa yn difeyth Yuda.

¹ A Dhuw, ty yw ow Duw, my a'th hwither dihwans. Yma syghes dhe'm enev war dha lergh, ow hig a'n jeves hireth ragos, yn tir kras ha sygh ma nag eus dowr.

² Yn kettella re viris vy orthis y'n sentri, dhe weles dha nerth ha'th wolewder.

³ Rag gwell yw dha dregeredh ages bewnans; ow diwweus a'th wormel.

⁴ Ytho my a'th vennik hedre vewiv; my a dhrehav ow diwleuv dhe'th hanow.

⁵ Ow enev a vydh kontentys kepar dell ve gans mer ha blonek, ha'm ganow a'th wormel gans diwweus heudhik,

⁶ pan borthav kov ahanas war ow gweli, ha prederi ahanas yn goelyow an nos.

⁷ Rag ty re beu ow gweres, hag yn skeus dha eskelli y kanav gormola.

⁸ Ow enev a len orthis; dha leuv dhyghow a'm menten.

⁹ Mes an re a hwila ow enev rag y dhistrui yth ons yn rannow isella an nor.

¹⁰ I a vydh delivrys dhe nerth an kledha; i a vydh rann dhe'n owrgeun.

¹¹ Mes an myghtern a lowenha yn Duw; oll an re a de yn y hanow ev a vost, rag ganow an re a wowlever a vydh deges.