Salmow 6 - An Bibel Kernewek 20234 (Kernewek Kemmyn)

Dhe vester an keur: gans daffar kerdyn; war Sheminith. Salm a Davydh.

¹ A Arloedh, na rebuk vy y'th sorr, ha na geredh vy y'th konnar.

² Bydh grassyes orthiv, A Arloedh, rag difredh ov vy; yaghha vy, A Arloedh, rag ow eskern yw troblys.

³ Ow enev ynwedh yw pur dhyegrys. Mes ty, A Arloedh – pygemmys prys?

⁴ Dehwel, A Arloedh, delirv ow enev; salw vy a-barth dha dregeredh.

⁵ Rag yn ankow nyns eus kov ahanas; piw a'th wormel yn ifarn?

⁶ Skwith ov vy a'm hanasa; pub nos my a lyb ow gweli; gans ow dagrow my a soub ow growedhva.

⁷ Ow lagas a fyll drefenn poenvos; ev a wannha drefenn ow eskerens oll.

⁸ Diberthewgh dhiworthiv, hwi dhrogoberoryon oll; rag an Arloedh re glewas lev ow oelva.

⁹ An Arloedh re glewas ow govynnadow; an Arloedh a dhegemmer ow fysadow.

¹⁰ Oll ow eskerens a berth meth hag a vydh euthegys; i a dreyl war-dhelergh, hag a berth meth yn tromm.