Salmow 58 - An Bibel Kernewek 20234 (Kernewek Kemmyn)

Dhe vester an keur: Al Tashheth. Miktam a Davydh.

¹ A leverowgh hwi gwirvreus yn hwir? A vreusowgh yn ewnder, hwi vebyon den?

² Hwi a wra sherewneth yn agas kolonn; hwi a dhyllo garowder agas diwleuv y'n nor.

³ An debeles yw estrenyon dhiworth an brys; i a wander yn stray kettell vons dineythys, ow kowleverel.

⁴ Aga venim yw kepar ha venim an sarf; yth yns i kepar ha'n nader neb a dhege hy skovarn;

⁵ Neb na glew lev an hudoryon na hwath an pystrier konnyk.

⁶ Torr aga dyns yn aga ganow, A Dhuw; brew challa an lewyon yowynk, A Arloedh.

⁷ Gwrens i mos dhe-ves i avel dowr prest ow resek; pan bleg y warak, na vedhes y sethow lymm.

⁸ Teudhens i dhe-ves avel melhwesenn yn unn dremena; avel flogh genys marow, ma na wellons an howl.

⁹ Kyns agas kalteryow dhe synsi toemmder an spern, gwres ev aga hemmeres dhe-ves hwath yn few, dell ve gans korwyns.

¹⁰ An den gwiryon a lowenha pan wel dial; ev a wolgh y dreys yn goes an tebelwas.

¹¹ Ha tus a lever, ‘Yn hwir yma pewas dhe'n den gwiryon; yn hwir yma Duw a vreus y'n nor.’