Salmow 55 - An Bibel Kernewek 20234 (Kernewek Kemmyn)

Dhe vester an keur. Gans daffar kerdyn. Maskil a Davydh.

¹ Ro skovarn, A Dhuw, dhe'm pysadow, ha na omgudh rag ow govynnadow.

² Goslow orthiv, ha gorthyp dhymm. Grevys ov y'm krodhvol, ha gul kynvann

³ drefenn lev an eskar, drefenn gwask an tebelwas; rag i a dhre trobel warnav, hag yn sorr i a'm kas.

⁴ Ow holonn yw paynys yn feur a-bervedh ynnov, hag euth ankow re goedhas warnav.

⁵ Own ha skruth re dheuth warnav, ha kren re'm kudhas.

⁶ Ha my a leveris, ‘A pe genev eskelli avel kolomm ena y hwrussen vy nija dhe-ves ha powes;

⁷ otta, my a wandersa a-bell, ha triga y'n difeyth. Sela.

⁸ My a fisa toeth men dhe skovva rag an korwyns ha'n annawel.’

⁹ Distru, A Arloedh, ha fols aga thavosow; rag my re welas garowder ha strif y'n sita.

¹⁰ Dydh ha nos ymons i ow mos a-dro dhedhi war hy fosow; yma dregynn ha meschyv a-bervedh ynni.

¹¹ Yma terroes a-bervedh ynni; ny dhiberth arwask na falsuri dhiworth hy stretys.

¹² Rag ny veu eskar neb a'm skornyas; mara pe, my a'n porthsa; ha nyns o an den a'm kasas neb a'm despityas; mara pe, my a omgudhsa ragdho;

¹³ mes ty, den avelov vy, ow heskoweth, ha'm kothman.

¹⁴ Ni a geskewsi yn hweg an eyl gans y gila, ha ni ow kerdhes yn chi Duw gans an routh.

¹⁵ Des ankow warnedha, ha diyskynnens yn few dhe ifarn; rag yma sherewneth yn aga annedhow, hag yn aga mysk.

¹⁶ Mes my a elow war Dhuw, ha'n Arloedh a'm selow.

¹⁷ Y'n gorthugher hag y'n myttin, ha dhe hanter-dydh my a grodhvol ha kyni, hag ev a glew ow lev.

¹⁸ Ev a dhelivras ow enev yn kres dhiworth an gas o er ow fynn, rag yth esa lies huni a strivyas genev.

¹⁹ Duw a glewvydh hag a worthyp dhedha, ev neb re reynyas war y dron bythkweth. Sela. Rag nyns eus treylvaow dhedha, ha ny berthons own a Dhuw.

²⁰ Ev re worras y leuv erbynn an re usi yn kres ganso; ev re dorras y gevambos.

²¹ Aga ganow o levenna es amanynn, mes yth esa bresel yn aga holonn; aga lavarow o medhella ages olew, mes yth ens i kledhedhyow noeth.

²² Towl dha vegh war an Arloedh, hag ev a'th sosten; ny as ev nevra an re wiryon dhe drebuchya.

²³ Mes ty, A Arloedh, a's gorr yn-nans dhe doll an pytt; ny vew tus woesek ha fals moy ages hanter aga dydhyow; byttegyns my a drest ynnos jy.