Salmow 54 - An Bibel Kernewek 20234 (Kernewek Kemmyn)

Dhe vester an keur: gans daffar kerdyn. Maskil a Davydh, pan eth an Zifysi ha leverel dhe Sowl, ‘Yma Davydh yn-dann gudh yntredhon.’

¹ Salw vy, A Dhuw, a-barth dha hanow, ha breus vy y'th nerth.

² Klew ow fysadow, A Dhuw; ro skovarn dhe lavarow ow ganow.

³ Rag estrenyon re sevis er ow fynn, ha tus fell a hwila ow enev, na worrsons Duw a-dheragdha. Sela.

⁴ Otta, Duw yw ow gwereser; yma an Arloedh gans an re a skoedh ow enev.

⁵ Ev a attal drog dhe'm eskerens; kis i y'th wirder.

⁶ My a wra sakrifis dhis gans offrynn bolonjedhek; my a wormel dha hanow, rag y vos mar dha.

⁷ Rag ev re'm delivras dhiworth pub anken, ha'm lagas re welas y vynnas war ow eskerens.