Salmow 53 - An Bibel Kernewek 20234 (Kernewek Kemmyn)

Dhe vester an keur: war Mahalath. Maskil a Davydh.

¹ An den anfur re leveris yn y golonn, ‘Nyns eus Duw.’ Legrys yns, hag i re wrug sherewneth kasadow; nyns eus denvyth a wrello dader.

² Duw a viras war-woeles dhiworth nev war vebyon den, dhe weles mars esa denvyth fur, ow hwilas Duw.

³ Pubonan anedha re gildennas, legrys yns i oll war-barth; nyns eus denvyth a wrello dader, nyns eus nagonan.

⁴ A ny gonvedh an dhrogoberoryon, ow tybri ow fobel kepar dell dhebrons bara? Ny alwsons war Dhuw.

⁵ Ena yth esens i yn own bras yn tyller ma nag esa own; rag Duw re skattras eskern an den a gampyas a-dro dhis; ty re wrug mewl dhedha, rag Duw dh'aga dispresya.

⁶ A teffa selwyans Ysrael yn-mes a Sion! Pan dreyl Duw kethneth y bobel, Yakob a vydh lowen, ha heudhik vydh Ysrael.