Salmow 47 - An Bibel Kernewek 20234 (Kernewek Kemmyn)

Dhe vester an keur. Salm a vebyon Koragh.

¹ Takyewgh diwleuv, hwi boblow oll; kenewgh dhe Dhuw gans lev lowender.

² Rag an Arloedh, an Ughella, yw euthyk, myghtern bras yw ev war oll an nor.

³ Ev a feth an poblow yn-dannon, ha'n kenedhlow yn-dann agan treys.

⁴ Ev a dhewis agan ertach ragon, goeth Yakob y garadow. Sela.

⁵ Duw re yskynnas gans garm lowender, an Arloedh gans lev an trompa.

⁶ Kenewgh gormola dhe Dhuw, kenewgh gormola; kenewgh gormola dh'agan myghtern, kenewgh gormola.

⁷ Rag Duw yw Myghtern oll an nor; kenewgh gormola gans skians.

⁸ Reynya a wra Duw war an kenedhlow; Duw yw esedhys war dron y sansoleth.

⁹ Pennsevigyon an poblow yw omguntellys war-barth, gans pobel Duw Abraham. Rag Duw a'n jeves skoesow an nor, ughelhes yn feur yw ev.