Salmow 38 - An Bibel Kernewek 20234 (Kernewek Kemmyn)

Salm a Davydh, rag kovadh.

¹ A Arloedh, na rebuk vy y'th sorr, ha na geredh vy y'th konnar.

² Rag dha sethow re'm dewanas, ha'th leuv re dheuth yn-nans warnav.

³ Nyns eus yeghes y'm kig drefenn dha sorr; ha nyns eus kres y'm eskern drefenn ow feghes.

⁴ Rag ow hammweythresow res eth dres ow fenn, yth yns i avel begh re boes ragov.

⁵ Ow goliow yw flerys ha podredhek drefenn ow follneth.

⁶ Kromm ov vy ha plegys glan dhe'n dor; oll an jydh yth esov ow kyni.

⁷ Rag ow diwglun yw leun a gleves kasadow, ha nyns eus yeghes y'm kig.

⁸ Difredh ov vy ha brewys dres eghenn; my re hanasas drefenn ankres ow holonn.

⁹ A Arloedh, yma oll ow yeunes a-dheragos; ha nyns yw ow hanas kudhys ragos.

¹⁰ Ow holonn a lemm, ow nerth re'm gasas; ha golow ow dewlagas ynwedh a fyll dhymm.

¹¹ Ow haroryon ha'm kowetha a gildenn dhiworth ow fla, ha'm neshevin a sev a-bell.

¹² Ha'n re a hwila ow enev a worr maglennow; ha'n re a vynn ow fystiga a gews a wodrosow, ow prederi falsuri oll an jydh.

¹³ Mes my yw avel bodhar, ny glewav; hag avel avlavar na iger y anow.

¹⁴ Hag yth ov vy avel den na glew, ha nag eus gorthyp yn y anow.

¹⁵ Rag ynnos jy, A Arloedh, y trestyav; ty a worthyp dhymm, A Arloedh ow Duw.

¹⁶ Rag my a leveris, ‘Na lowenhens i er ow fynn, na vostyens warnav pan drebuch ow throes.’

¹⁷ Rag parys ov vy dhe drebuchya, hag yma ow galar prest a-dheragov.

¹⁸ Rag my a avow ow hammweyth; troblys ov drefenn ow fegh.

¹⁹ Mes bew ha nerthek yw ow eskerens, ha meur yw niver an re a'm kas yn fals.

²⁰ Ha'n re a attal drog rag da yw ow eskerens rag my a hol dader.

²¹ Na as vy, A Arloedh; A Dhuw, na vydh pell dhiworthiv.

²² Deus uskis dhe'm gweres, A Arloedh ow selwyans.