Salmow 3 - An Bibel Kernewek 20234 (Kernewek Kemmyn)

Salm a Davydh, pan fias dhiworth Absalom y vab.

¹ A Arloedh, fatell yw ow eskerens ynkressys! Lies yns i neb a sev er ow fynn;

² lies yns i neb a lever a'm enev, ‘Nyns eus gweres ragdho yn Duw.’ Sela.

³ Mes ty, A Arloedh, yw skoes a-dro dhymm, ow glori, neb a dhrehav ow fenn.

⁴ My a elwis war an Arloedh gans ow lev, hag ev a worthybis dhymm mes a'y venydh sans. Sela.

⁵ My a wrowedhas ha koska; ha my a dhifunas, rag an Arloedh a'm skoedh.

⁶ Ny borthav own a dhegow a vilyow a'n bobel, neb re omsettyas a-derdro er ow fynn.

⁷ Sav, A Arloedh; salw vy, ow Duw! Rag ty re weskis oll ow eskerens war an challa; ty re dorras dyns an debeles.

⁸ Dhe'n Arloedh yma selwyans; yma dha vennath war dha bobel. Sela.