Salmow 28 - An Bibel Kernewek 20234 (Kernewek Kemmyn)

Salm a Davydh.

¹ Warnas jy y halwav, A Arloedh; ow harrek, na vydh bodhar orthiv vy, ma na viv, mar tewydh, kepar ha'n re a dhiyskynn dhe'n pytt.

² Klew lev ow govynnadow, pan griav dhis rag gweres, pan dhrehavav ow diwleuv troha'th tempel sans.

³ Na'm kemmer vy dhe-ves gans an debeles na gans an dhrogoberoryon, neb a lever kres gans aga hynsa, ha dregynn yn aga holonn.

⁴ Ro dhedha i herwydh aga ober, ha herwydh sherewneth aga gwriansow; ro dhedha i herwydh ober aga diwleuv; attal dhedha aga gober gwiw.

⁵ Rag ny wrons vri a wriansow an Arloedh, na ober y dhiw­leuv, ev a's tewl dhe'n dor, ha ny's drehav.

⁶ Benniges re bo an Arloedh, rag ev re glewas lev ow govynnadow.

⁷ An Arloedh yw ow nerth ha'm skoes; ow holonn re drestyas ynno ev, ha gweresys ov vy, ytho ow holonn a lowenha yn feur, ha gans ow han my a'n gormel.

⁸ An Arloedh yw nerth y bobel, hag ev yw skovva selwyans y Untys.

⁹ Salw dha bobel, ha bennik dha ertach; bydh aga bugel, ha'ga drehevel bynitha.