Salmow 25 - An Bibel Kernewek 20234 (Kernewek Kemmyn)

Salm a Davydh.

¹ Dhiso jy, A Arloedh, y trehavav ow enev.

² Ow Duw, my a drest ynnos jy, na as vy dhe berthi meth; na vedhes ow eskerens heudhik a'm govis.

³ Sur na berthes meth an re a drest ynnos jy; perthes meth an re a wra falsuri heb ken.

⁴ Diskwa dhymm dha fordhow, A Arloedh; dysk dhymm dha hynsyow.

⁵ Hembronk vy y'th wirder, ha dysk dhymmo vy, rag ty yw Duw ow selwyans; ynnos jy y trestyav oll an jydh.

⁶ Porth kov, A Arloedh, a'th truedh ha'th tregeredh, rag i re beu yn few trank heb worfenn.

⁷ Na borth kov a beghosow ow yowynkneth, na'm kammweyth; herwydh dha dregeredh porth kov ahanav, A Arloedh, a-barth dha dhader.

⁸ Da hag ewn yw an Arloedh; rakhenna ev a dhysk dhe beghadoryon y'n fordh.

⁹ Ev a hembronk an re uvel yn gwirvreus, hag ev a dhysk y fordh dhe'n voghosogyon.

¹⁰ Oll hynsyow an Arloedh yw tregeredh ha gwirder, dhe'n re a with y gevambos ha'y dhustuniow.

¹¹ A-barth dha hanow, A Arloedh, gav dhymm ow hammweyth, rag meur yw.

¹² Py den yw ev neb a berth own a'n Arloedh? Ev a dhysk dhodho y'n fordh a dhewis ev.

¹³ Y enev a drig yn sewenyans, ha'y has a erit an tir.

¹⁴ Yma kevrin an Arloedh gans an re a berth own anodho, hag ev a dhiskwa dhedha y gevambos.

¹⁵ Prest yma ow dewlagas war an Arloedh, hag ev a dhre ow threys yn-mes a'n roes.

¹⁶ Treyl dhymmo vy, ha bydh grassyes orthiv; rag digoweth ha boghosek ov vy.

¹⁷ Ankenyow ow holonn yw meur aga niver, tenn vy yn-mes a'm ankres.

¹⁸ Mir orth ow anken ha'm poenvos, ha gav oll ow feghosow.

¹⁹ Mir orth ow eskerens, rag meur yw aga niver, ha gans kas fell i a'm kas.

²⁰ Gwith ow enev ha gwra ow delivra; na as vy dhe berthi meth, rag my a hwila skovva ynnos jy.

²¹ Re'm gwittho perfydhder ha gwiryonsys, rag my a hwila skovva ynnos jy.

²² Daspren Ysrael, A Dhuw, yn-mes a'y ankenyow oll.