Salmow 16 - An Bibel Kernewek 20234 (Kernewek Kemmyn)

Miktam a Davydh.

¹ Gwith vy, A Dhuw, rag ynnos jy y hwilav skovva.

² My re leveris dhe'n Arloedh ‘Ty yw ow Arloedh, nyns eus genev travyth da a-der ty.’

³ A-barth an syns usi y'n vro, ha'n re vryntin, yma oll ow lowena ynna i.

⁴ Aga galarow a voghha, seul a fysk war-lergh duw arall; ny offrynnav goes aga offrynnow-diwes, ha ny gemmerav aga henwyn y'm diwweus.

⁵ An Arloedh yw ow rann dhewisys ha'm hanaf; ty a syns ow hevrenn.

⁶ An rann re goedhas ragov yn tylleryow teg; devri yma dhymm ertach splann.

⁷ My a vennik an Arloedh, neb a ros dhymm kusul; devri ow lonethi a'm kesk yn termyn nos.

⁸ My re worras an Arloedh prest a-dheragov; drefenn y vos ev a'm leuv dhyghow, ny drebuchyav.

⁹ Rakhenna heudhik yw ow holonn, ha'm enev a lowenha, ha'm kig ynwedh a drig yn sawder.

¹⁰ Rag ny vynnydh gasa ow enev yn ifarn, na ri dha Sans dhe weles an pytt.

¹¹ Ty a dhiskwa dhymm an fordh a vewnans; y'th wolok jy yma lanwes lowena, y'th leuv dhyghow yma joy nevra a bes.