Salmow 149 - An Bibel Kernewek 20234 (Kernewek Kemmyn)

¹ Gormelewgh an Arloedh. Kenewgh dhe'n Arloedh kan nowydh, y wormola yn kuntelles an syns.

² Gwres Ysrael lowenhe yn y Wrier; bedhes mebyon Sion heudhik yn aga Myghtern.

³ Gormelens i y hanow y'n dons, kanens gormola dhodho gans tabourik ha sowtri.

⁴ Rag an Arloedh a gemmer plesour yn y bobel; ev a afin an re hwar gans selwyans.

⁵ Lowenhes an syns gans gordhyans; gwrens i garma yn lowen war aga gweliow.

⁶ Bedhes gormola Duw yn aga ganow, ha kledha dewvinek yn aga diwleuv;

⁷ dhe gemmeres dial war an kenedhlow, ha gorra kessydhyans war an poblow;

⁸ dhe gelmi aga myghternedh gans kadonyow, ha'ga fennsevigyon gans kargharow-horn;

⁹ dhe gollenwel breus warnedha dell yw skrifys. An enor ma yw gober oll y syns. Gormelewgh an Arloedh.